"Ірі көлемде ақша жымқырды" деген күдікпен ұсталған ерікті Перизат Қайратқа қатысты сот отырысы үшінші күнге жалғасып отыр.
Бүгінгі сот процесі тағы басқа куәгерлерден жауап алынды, деп хабарлайды inbusiness.kz сайты.
"BizBirgemiz Qazaqstan 2030" қорының жетекшісі болған Перизат Қайрат пен оның анасына қатысты сотта "Стройконструкция" АҚ-ның өкілі, заңгер Галина Исаева жауап берді.
Оның сөзінше, компания 2024 жылғы су тасқыны уақытында Перизат Қайраттың қорына 200 миллион теңге аударған.
Куәгер құрылыс компаниясы аталған қормен байланысқа шыққанын айтады. Компания қайырымдылық қоры жайында ең әуелі әлеуметтік желілерден көрген. Сондықтан 2024 жылдың 2 мамырында су тасқынынан зардап шеккендерге көмек көрсету туралы шешім қабылдайды. Сөйтіп 10 мамыр күні Перизат Қайрат қорының шотына 200 миллион теңге аударған. Қордың реквизитін жарнамадағы бейнероликтен алған.
– Неліктен мен жарнаманы басшыма көрсеттім? Онда Перизат Қайраттың "Несиені тоқтатыңдар!" деген сияқты өтініші болған. Бұл бізге қатты әсер қалдырды. Себебі, адамдар расымен қиын жағдайда еді, – деп мәлімдеді Галина Исаева сотта.
Ол сөз арасында қорға ірі компаниялар мен банктердің қомақты қаржы аударуы сенім бергенін де айтып өткен.
Бұған дейін Перизат Қайратқа Назарбаев мектебінің ата-аналары да 1 миллион теңгеге жуық қаржы жинап бергенін жаздық.
