Тепличный ауылы мен Дельта саяжайында 31 үй сүрілмек.
Петропавлда үйлерінің сүрілуіне қарсы шыққан жұрт шу шығарды, деп хабарлады 31 арнаның Информбюро ақпараттық бағдарламасы.
Себебі, жергілікті билік Тепличный ауылы мен Дельта саяжайында тұрған бас-аяғы отыздан астам баспананы бұзып, былтыр салынған бөгеттің орнын жылжытпақ. Өйткені асқынға тосқауыл болатын дамбы су құбырының үстінен салынған екен. Енді әкімдіктің қателігінен үйсіз далада қалатын болдық дейді ашынған халық.
Тепличный ауылын көктемде су тасқынынан қорғайтын бөгет дәл осы жерде қайта салынбақ. Соның салдарынан мұндағы үйлер сүрілетін болды. Бірақ бұған тұрғындар қарсы шығып жатыр.
Ербатыр Жүнісов табан ақы, маңдай терін төгіп үй салғаны кеше. Енді бір-ақ сәтте бәрінен айырылғалы тұр. Мұндай қиын сәтке тап болған жалғыз Ербатыр емес. Бүкіл саяжай тұрғындары бүгін сүру жұмыстарына келген ауыр техниканың алдына тұрып, тоқтатуға мәжбүр болды
Жалпы, Тепличный ауылы мен Дельта саяжайында 31 үй сүрілмек. Оның орнына былтыр салынған бөгетті жылжыту жоспарланған. Бірақ бұл жайсыз хабарды жұрт тым кеш білдік дейді.
Бөгет құрылысының жобасы қайта қаралғанымен, тұрғындарға бұл туралы ескертілмепті. Шенеуніктер барлық үйлер мемлекет қажеттілігіне қайтарылып, өтемақы беріледі дейді. Оған дейін мердігер компания бірде бір жекеменшік аумаққа кірмеуге тиіс.
"Бөгеттің құрылысы былтыр басталған. Биыл бюджеттен қосымша 2,8 миллиард теңге бөліп, оны нығайту басталды. Яғни, биіктігін көтеріп, бетон плитамен қаптаймыз. Сонымен қатар жобалық сметалық құжаттарға өзгерістер енгізуге тура келді. Себебі, бөгеттің астында су құбыры жатыр. Дамбының кей бөлігін саяжайларға қарай жылжытамыз", – деді Қызылжар ауданы әкімінің міндетін атқарушысы Бейбіт Исманов.
Ал тұрғындар өтемақы алмағанша бөгеттің құрылысына жол бермейміз деп отыр.
