Ведомство өкілдері аталған жерде судың ағыны қауіпті екенін ескертеді: су сізді лезде ағызып әкетуі мүмкін, көмек шақырып үлгермей қаласыз .
Алматының төтенше жағдайлар департаменті қала тұрғындарына үндеу жасады, деп хабарлайды inbusiness.kz сайты.
"Сіз Үлкен Алматы өзенінің бойында – Төле би көшесінен Райымбек даңғылына дейінгі, яғни өзен Сайран көлінен шығып жатқан бөлігінде біреулердің шомылып жүргенін немесе кілем жуып жатқанын талай рет көрген боларсыз. Бірақ бұл аумақтың қауіпті екенін, мұнда шомылуға қатаң тыйым салынғанын білесіз бе?" – делінген ТЖД хабарламасында.
Аталған аумақта жаз кезінде шомылатындар және кілемдерін жууға келетіндер көп.
"Осыны еске салу мақсатында Әуезов ауданының төтенше жағдайлар басқармасы әкімдікпен бірлесіп, өзен арнасы бойына "Шомылуға болмайды!" деген ірі жазбалар орнатты. Бір сәттік салқындау үшін өміріңізді қатерге тікпеңіз. Өзіңізге сақ болыңыз!" – делінген қалалық ТЖД үндеуінде.
