Бүгін Астана қаласы Қылмыстық істер жөніндегі ауданаралық сотында Перизат Қайратқа қатысты басты сот отырысы жүріп жатыр.
Процестің екінші күні де куәгерлерден жауап алу жалғасып жатыр. Бірінші болып "Асар Уме" қайырымдылық қорының президенті Асхат Нұрмашев шақырылды. Істе ол жетекшілік ететін қор «BIZ BIRGEMIZ QAZAQSTAN 2030» қорының шотына 200 млн теңге аударғаны туралы мәлімет бар. Бұл қаражат Палестина халқына көмекке жіберілуі керек еді. Асхат Нұрмашевтың айтуынша, ол Перизат Қайратпен бірге Абу-Дабиге барып, ондағы қоймада жиналған заттарды көргендіктен Асар Үме қоры Газа секторына көмекке қаражат жинаған. Есесіне сотталушы Абу-Дабидегі халықаралық қоймаға кіруге рұқсат алып беруге уәде еткен. Ол жерге рұқсат алған соң тағы 93 млн теңге жіберуі керек еді. Алайда Перизат Қайраттың шоты бұғатталып, қайырымдылықтың шын мәнінде жасалғаны туралы тиісті есептер болмағандықтан бұл қаражатты жіберуден бас тартып, бұған дейін аударылған ақшаны қайтаруын сұраған. Екінші болып тағы бір жәбірленуші Олжас Садық тыңдалды. Ол Перизат Қайраттың қоғамдық бірлестігіне азаматтардан жиналған 83 млн теңгені аударған. Одан бөлек Перизат Қайрат Олжас Садықты қайырымдылық әрекеттері туралы видео дәлелдер түсіруге шақырған. Нақтырақ айтқанда, еліміздегі су тасқынынан зардап шеккен қазақстандықтар мен Палестина халқына арналған гуманитарлық көмек жиналған қоймаларға апарған. Олжас Садықтың сөзінше, ол кейін өзі аударған қаражаттың мақсатты жұмсалғаны туралы есепті сұрағанымен Перизат Қайрат ешқандай дәлел келтірмеген. Одан кейін сотталушыға 86 млн теңгеге 3 бөлмелі пәтерін сатқан куәгер Жанерке Елжановадан жауап алынды. Сонымен қатар Перизат Қайрат Жанерке Елжанованы бірнеше үй мен коммерциялық ғимараттарға жөндеу жұмыстарын жүргізуге тартқан. Одан кейін тағы бір куәгер Балжан Шошақова тыңдалды. Ол 2024 жылы Перизат Қайратқа меншігіндегі коммерциялық ғимаратты 2 млн теңгеге жалға берген. Бесінші куәгер – алматылық Екатерина Юхатова. Куәгердің айтуынша, ол 2023 жылы Перизат Қайратқа 30 млн 30 мың теңгеге Мерседес автокөлігін сатқан. Алайда сотталушы бұл адамды мүлдем танымайтынын, ешқашан көрмегенін мәлімдеді. Судья Екатерина Юхтаеваға жалған куәлік берудің жауапкершілігі барын ескертіп, арнайы хат жолдайтынын мәлімдеді. Түске дейінгі процесте соңғы болып ақтөбелік Алтын Мусинадан жауап алынды. Ол Перизат Қайратқа бухгалтерлік қызмет көрсеткен. Естеріңізге сала кетейік, кеше бірінші эпизод, яғни ерекше қажеттілігі бар балаларға арналған оңалту орталығы мен қайырымдылық фестивалі бойынша үш жәбірленуші мен алты куәгер тыңдалды. Олардың ішінде Перизат Қайраттың қоғамдық бірлестігіне 10 және 5 млн теңгеден қаражат аударған екі құрылыс компаниясының басшылары мен Біз біргеміз қорының бұрынғы құрылтайшылары бар.
