Бұл туралы Қазақстан футбол федерациясының президенті "Qazsport" арнасына берген сұхбатында айтты.
Оның сөзінше, аталған жоба мемлекеттік бюджетке ешқандай салмақ салмайды, деп хабарлайды inbusiness.kz сайты.
Марат Омаров сұхбат барысында отандық футбол клубтарын жекешелендіру мәселесіне де тоқталды.
Осы күні жекешелендіруге ұсынылған клубтардың арасында "Астана", "Ақтөбе" және "Атырау" футбол клубы бар. Қазіргі уақытта инвесторлар әріптестіктің жаңа мүмкіндігін, тиімділігін қарастырып жатқан көрінеді.
– Бүгінде көптеген футбол клубы бюджет есебінен қаржыландырылады. Бұл туралы әртүрлі пікір бар. Бас прокуратура мен басқа да құқықтық органдар клубтарды тексерді. Сұрақ көп. Клубтарға жыл сайын орташа 3 млрд теңге бөлінеді, бірақ ол ақша легионерлер мен шетелдік мамандарға жұмсалды. Десе де, клубтардың инфрақұрылымы, академиясы мен стадионы жоқ. Бұл дұрыс емес, – деп ашығын айтты ол.
Қазақстан футбол федерациясының президентінің пікірінше, жеке инвестор жетекшілік етсе, оның өз активі пайда болады. Басқа демеушілер арқылы тағы да инвестиция тартуға әрекет жасайды. Сол себепті, Қазақстан футбол федерациясы да инвестор тартуға көмектесетін тарап ретінде жұмыс істеуді бастаған.
Марат Омаров сұхбатта тағы бір сүйінші жаңалығымен бөлісті.
– ФИФА-дан алғаш рет қалалар мен ауылдағы мектептерге 100 шағын алаң салуға қаржы алдық. Бұл жоба мемлекеттік бюджетке салмақ салмайды, – деді ҚФФ президенті.
