Қазақстан медицинасының аңызы, көрнекті дәрігер, ғалым әрі қоғам қайраткері Нина Амировна Каюпова өмірден өтті. Бұл туралы Асфендияров атындағы Қазақ ұлттық медицина университетінің баспасөз қызметіне сілтеме жасаған KAZ.NUR.KZ хабарлайды.
Нина Амировна – еліміздегі акушерлік-гинекологиялық қызметтің қалыптасуына елеулі үлес қосқан тұлға, Акушерлік, гинекология және перинатология ғылыми орталығының негізін қалаушылардың бірі.
Өзінің ұзақ та мазмұнды кәсіби жолында 30 мыңнан астам сәбидің дүниеге келуіне себепкер болып, 25 ғылым докторын, 40 ғылым кандидатын дайындаған. 19 монография мен 400-ден астам ғылыми мақала жазып, отандық медицинаның дамуына баға жетпес үлес қосқан.
Соңғы жылдары да белсенді еңбек етіп, ана мен бала денсаулығы бойынша республикалық орталықта бас ғылыми қызметкер әрі салалық журналдың бас редакторы болып қызмет еткен.
Нина Амировна бала күнінен дәрігер болуды армандаған. Алматылық медициналық институтта оқып жүргенде акушерлікке біржола бет бұрып, осы салаға 60 жылдан аса ғұмырын арнаған. Қарапайым дәрігерден бастап, республикалық деңгейдегі ғылыми-зерттеу орталықтарының басшылығына дейінгі жолдан өткен.
Ол білім беруге де ерекше мән берген. Қазақ ұлттық медицина университетінде 15 жыл дәріс оқып, болашақ мамандарды тәрбиелеуге аянбай үлес қосқан. Ел өңірлерінде акушерлік қызметті ұйымдастыру мен дамытуды үйлестіріп, жүздеген маманның кәсіби қалыптасуына ықпал еткен.
Нина Амировна жаңа ғылыми бағыттар енгізуде де белсенді болған. Соның ішінде, оның жетекшілігімен пайда болған "экологиялық репродуктология" бағыты – бүгінгі медицина үшін аса өзекті. Бұл салада ол қоршаған ортаның болашақ ана мен баланың денсаулығына әсері туралы тың деректер мен нақты ұсыныстар ұсынған.
Нина Амировна – тек медицина саласында емес, қоғамдық және саяси өмірде де белсенді болған. Ол жоғарғы кеңестің депутаты, сенат мүшесі ретінде ел болашағы үшін маңызы зор заңдарды қабылдауға атсалысқан. Отбасылық тәрбие, жастар құқығы, әйелдер мен балаларды қорғау бағытында бастама көтеріп, БҰҰ-ның жоғары мінберінде Қазақстанның атынан сөз сөйлеген. Әйелдер істері және отбасылық-демографиялық саясат жөніндегі ұлттық комиссияда, Қазақстан халқы Ассамблеясында, әйелдер кеңесінде белсенді жұмыс атқарған.
Ерен еңбегі үшін "Парасат" орденімен, президенттің бейбітшілік пен рухани келісім жөніндегі мемлекеттік сыйлығымен, "Достық" орденімен және басқа да мемлекеттік марапаттармен марапатталған. Алматы қаласының Құрметті азаматы.
Мәтіннен қате тапсаңыз, бізге жазыңыз
