Үкімет отырысынан кейін өткен брифингте журналисттердің бірі несие пайызының неге жоғары екеніне қатысты сұрақ қойды. Оған экономика саласына жауапты вице-премьер Серік Жұманғарин жауап берді, деп хабарлайды KAZ.NUR.KZ үкіметтің баспасөз қызметіне сілтеме жасап.
"Ешқандай жасыратыны жоқ, үкіметтің мақсаты – экономикалық өсім. Ол 6-7 пайыз көлемінде. Ал Ұлттық банктің мақсаты – инфляцияны тежеу. Оны 5 пайыз шамасында ұстап тұру. Кейбір кезде осы екі саясат бір-біріне қайшы келіп жатады. Таяуда базалық мөлшерлеме көтерілді. 16,5 пайыз болып белгіленді. Сол себепті нақты секторға кредиттердің берілуі шамалы қиындап жатыр. Өйткені, 20-22 пайызбен бір бизнес жобаны көтеру өте қиын. Бірақ тұтынушы секторға ешқандай әсер етіп жатқан жоқ", — деді вице-премьер Серік Жұманғарин.
Сондықтан да, оның айтуынша, үкімет даму институттарына ақша құю туралы шешім қабылдады.
"Біз даму инститтарымызды одан әрі дамытқалы отырмыз. Мәселен, бас даму институтымыз "Бәйтерек" ұлттық холдингіне ақша құйып жатырмыз. Биыл 1 трлн теңге бөлінді. Ол бізге ішкі-сыртқы нарықтардан тағы да қосымша 7 трлн теңге тартуға мүмкіндік береді. Осылайша қаражат көлемі 8 трлн теңгеге жетеді. Оның 4 трлн-ы теңгемен, 12,6 пайызбен беріледі. Ол негізінен экспорттық жобаларға жұмсалады. Бұл өз кезегінде біздің Ішкі жалпы өнімнің 1,3 пайызға өсуіне әсер етпек. Осы жұмыстарды тұрақты жалғастыра отыра инфляцияны 8-10 пайыз көлемінде және одан төмен деңгейде тұрақтандыру мақсатымыз бар. Сол кезде, менің ойымша, Ұлттық банк те базалық мөлшерлемені төмендету бағытында қайта қарайтын болады деп сенеміз", — деді ол.
Мәтіннен қате тапсаңыз, бізге жазыңыз
