Олжас Бектенов қаражаттың жұмсалуы туралы есеп бақылауда әрі ашық болуы керектігін айтты.
Премьер-Министр Олжас Бектенов көпшіліктің назарын аударған, қайырымдылық қаражатын жымқыру дерегі бойынша күдікке ілінген "Асар-Үме" қорының жетекшісі Перизат Қайратқа қатысты пікір білдірді.
Үкімет отырысынан кейін өткен баспасөз конференциясында журналистер үкімет басшысына "Қазір Перизат Қайратқа қатысты миллиардтаған қаражаттың жымқырылуына байланысты резонансты іс жүріп жатыр. Осы орайда қайырымдылық қорлары мен қаражат жинаумен айналысатын ұйымдарға қойылатын талаптар мен олардың жұмысына қандай да бір өзгерістер енгізіле ме?" деген сауал қойды.
"Иә, менің бұл жағдайдан хабарым бар. Өкінішке қарай, өмір көрсетіп отырғандай, тек бюджет қаражаты ғана емес, азаматтардан қайырымдылық ретінде жиналған қаражат та мақсатсыз жұмсалып жатыр. Бұл кейс – соның айқын мысалы. Бұл – жалғыз оқиға емес, басқа да мысалдар бар. Бірақ, бұл істі ең резонансты деуге болады", – деп жауап берді үкімет басшысы.
Оқи отырыңыз: Қыз алып қашу – дәстүр ме, қылмыс па? Ара-жігін қалай ажыратамыз
Сондай-ақ, Олжас Бектенов мұндай құқықбұзушылықтардың алдын алу үшін қаржыны бақылау мен есептілікті қамтамасыз ететін жүйені заң жүзінде қайта қарау қажет екенін атап өтті.
"Қаражаттың жұмсалуы туралы есеп бақылауда әрі ашық болуы керек. Сондықтан бұл жерде, меніңше, Үкімет тарапынан да, құқық қорғау органдарының негізінде де, ұрлықтың нақты қалай жүзеге асқанын анықтау керек. Бұл – тиісті заңнамалық түзетулерді қабылдауға мүмкіндік. Болашақта осы секілді құқықбұзушылықтардың алдын алуға бағытталады", – деді ол.
Айта кетейік, дәл осы күні елордада Перизат Қайрат пен оның анасына қатысты қозғалған қылмыстық іс сотта қаралып жатыр. Сот процесінде куәгер ретінде сөз сөйлеген азамат "Асар-Үме" қорының президенті Перизат Қайратқа 200 миллион теңге аударғанын мәлімдеді.
