Астанадағы келіншектің айтуынша, әкімдік өкілдері оны алдап, басқа жаққа жіберіп, өзі мен күйеуі үйде жоқта баспанасын техникамен талқандаған, деп хабарлайды Skifnews.kz ақпарат порталы.
Сол кезде ішінде екі баласы ұйықтап жатқан екен.
“Балаларым бейқам ұйықтап жатқан еді. Мені әдейі шақырып алып, дәл сол сәтте баспананың төбесін қопарып, қабырғаларын қирата бастады. Бір жағынан экскаватормен, бір жағынан погрузчикпен төбесін жұлып жатыр. Балаларым шошып оянды. Дәл олардың жатқан жерін қиратты. Бұлардың бәрі бір-бірімен ауыз жаласқан жемқорлар. Ана мен баланың зарын тыңдайтын, әділдік айтатын адам қалмаған ба?” — деп ашынады тұрғын.
Оның сөзінше, бұл әрекет алдын ала жоспарланған. Себебі әкімдік өкілдері оны «құжаттарыңызды рәсімдейміз» деп шақырып алып, сонымен уақыт ұтқан. Ал қайтып келгенде баспанасының орны ойран болып жатқанын көрген.
“Әдейі жоспарлап істегендері көрініп тұр. Мен барғанша барлығын быт-шыт қылып үлгерді. Заңды да, арды да аяққа таптады. Құдайдан қорықпай ма?” — дейді ол.
Қала билігі бұл жағдайға байланысты әзірге ресми түсініктеме берген жоқ.
Ал қоғамда «азаматтардың құқығы мен қауіпсіздігін кім қорғайды?», «әкімдік қызметкерлерінің мұндай бассыздығына неге жол беріледі?» деген сұрақ бар.
Құқық қорғаушылардың айтуынша, әкімдік тарапынан жасалған кез келген шара заңмен рәсімделіп, адам өмірі мен денсаулығына қауіп төндірмеуі керек. «Балалардың көзінше осылай қиратып, үрей туғызу – барып тұрған сорақылық» дейді олар.
Посмотреть эту публикацию в Instagram
Публикация от Рустем Баязиев (@rustembayaziev)
