Ұлттық банк төрағасы Тимур Сүлейменов үкімет отырысында теңгенің айырбастау бағамының динамикасы туралы баяндады. Жыл басынан бері теңгенің бағамы бір доллар үшін 519,73 теңгеге дейін, яғни 1 пайызға нығайған, деп хабарлайды үкіметтің баспасөз қызметі.
Сыртқы факторларға әлемдік сауда соғыстарына байланысты нарықтағы құбылмалылық және Ресей рублінің нығаюы жатады. Сонымен қатар мұнай бағасы шамамен бір баррель үшін 70 доллар деңгейінде қалыптасқан.
Ішкі факторлар ретінде жылдың алғашқы айларында ұлттық валютаны қолдауға импорттық сатып алудың қысқаруы мен экспорттаушылардың салық төлемдері есебінен валюта ұсынысының ұлғаюы әсер етті.
Ұлттық банк төрағасының баяндамасына сәйкес, өткен айдың екінші жартысынан бері валюта нарығында сұраныстың артуына байланысты теңгенің айырбастау бағамының маусымдық өзгерісі байқалады. Оған халық арасында демалыс кезеңінің басталуы, бюджеттік бағдарламалар мен мемлекеттік сатып алуды белсенді іске асыруға байланысты заңды тұлғалар жағынан долларға деген сұранысының өсуі негізгі факторы болды. Десе де бұл өзгерістер қысқа мерзімді және бірқалыпты сипатқа ие дейді ол.
"Жалпы сыртқы орта қалыпты. Ал ішкі факторлар маусымдық сипатқа ие. Бұл жағдайда айырбастау бағамының айтарлықтай өзгеруі үшін негіз жоқ. Ұлттық Банк теңгерімсіздіктің жинақталуының алдын алатые икемді бағам белгілеу режимін ұстануды жалғастырады", — деді Тимур Сүлейменов.
Мәтіннен қате тапсаңыз, бізге жазыңыз
