Саран қаласында зейнеткер алаяқтарға алданып, үйінен айырылып қала жаздады, деп хабарлайды 24KZ. Бірақ қария риэлтордың арқасында киберқылмыскердің арбауынан аман қалды. Ол полицияға хабарласып , пәтер сату жөніндегі күмәнді келісімді дер кезінде тоқтатқан.

Алаяқтар хабарласқан күн 78 жастағы Татьяна Иванованың әлі есінде. Айтуынша, оған әлдекімдер телефон соғып, шотына қомақты сома аударылғанын айтқан. Бірақ оны шешіп алу үшін бір шарт бар. «Сіз шұғыл түрде пәтеріңізді сатуыңыз керек. Сонда ақшамен қоса пәтеріңізді қайтарып аласыз», – деп көндіруге тырысқан.

Татьяна Иванова, Саран қаласының тұрғыны:

- Мен бірден сеніп қалдым. Сауатты сөйлеп, бәрін егжей-тегжейлі түсіндіргендей болды. Сенімге кірудің түрлі психологиялық жолын әбден меңгеріп алғаны байқалып тұрды. «Үйдің құжаты дұрыс па?», – деп сұрады. «Сосын нотариусқа барып, келісімшарт жасаймыз, ақшасын кейін аласыз», – деді.

Осылайша қария риэлтор іздеуге бел буады. Бағына қарай Айнұр Иламбековаға жолыққан. Ол зейнеткердің бойында қобалжу барын, пәтерді сату жөнінде шартты жасауға асыққанын байқаған. Ал сатып алушыдан ақшаны алудан бас тартуы күмәнді тіпті тереңдете түскен.

Айнұр Иламбекова, риэлтор:

- Зейнеткердің күмәнді әрекетін, көңілінде қобалжу барын байқап, полицияға хабарласуға жөн көрдім. Олар клиентімнің алаяқтардың арбауына түсіп қалғанын анықтады. Содан пәтерді сату жөнінде келісімнің күшін жойдық.

Полицейлер Татьяна Иванованың шетелде тұратын қызына хабарласып, жағдайдың мән-жайын түсіндірген. Қазір ол анасымен бірге тұрып жатыр. Тәртіп сақшылары: «Бұл киберқылмыскерлердің қитұрқы жоспарларының бірі», – деп отыр. Олар жылжымайтын мүлік саласында жұмыс істейтін мамандармен үнемі профилактикалық шаралар жүргізіп тұрады.

Дінмұхамед Зияда, ПД Киберқылмысқа қарсы іс-қимыл басқармасының аға жедел уәкілі:

- Риэлторлық агенттіктермен, нотариустармен түсіндірме жұмыстары жүргізілді. Егер тұрғындар келіп, қандай да бір алып-сату шарттарын жасап жатса, егер біреумен қоңырау арқылы сөйлесіп жатса немесе өздерін психологиялық тұрғыда қобалжумен ұстаса, міндетті түрде полицияға хабарлауын түсіндірдік. Мінекей, сол оң нәтиже беріп отыр.

Биыл Саран қаласында 20 интернет-алаяқтық іс тіркеліп, 38 миллион теңге шығын келген. Ал облыс бойынша 1205 киберқылмыс тіркеліп, соның 145 әшкереленді. Жәбірленушілерге бір миллиард теңгеден астам шығын келген. Тіпті бір іс бойынша жәбірленушіні 64 миллион теңгеге сан соқтырған.

Авторлары: Руслан Нұрланұлы, Сайран Ақамбаев, Аман Хамит