Петропавлда былтыр тасқын кезінде су басқан аумақтар абаттандырылды , деп хабарлайды 24kz.
Ойқала және Былғары зауыт шағын аудандарында сүрілген үйлердің орнына 74 саябақ салынды. Бұл мақсатқа бюджеттен бірде-бір тиын жұмсалған жоқ. Демалыс орындары кәсіпкерлер есебінен салынды.
Петропавлда былтыр су кірген 1800 үй сүрілді. Содан бері бос жатқан аумақтар абаттандырылып, орнына саябақтар салынды. Енді бұл жерлер тұрғындардың сүйікті демалыс орнына айналады.
Ольга Попова, қала тұрғыны:
- Енді бұл жерде балалардың күлкісі жаңғырып жатыр. Біз өте қуаныштымыз. Шағын ауданымыз қайта түлеп, адам танымастай өзгерді.
Су басқан Ойқала және Былғары зауыт ықшам аудандарында балаларға арналған ойын алаңдары, жаяу жүргіншілер жолағы мен саябақтар бой көтерді. Ал Заречный кентінің тұрғындары түгел көшіріледі.
Әсем Айтолова, қалалық әкімдіктің баспасөз хатшысы:
- Биылғы жылы Заречный тұрғындарын толық көшіру шешімі қабылданды. Қазіргі таңда қаланың орталығында оларға арнап екі үй салынып жатыр. Жылдың соңына қарай олар көшіріле бастайды. Бұл абаттандыру жұмыстары әлі де келер жылы да жүргізіледі деп жоспарланып жатыр. Жаңағы Подгора ауданында велосипедтерге арналған жолдарын салу жоспары бар.
Бұл жұмыстарға жергілікті кәсіпкерлер демеушілік жасады. Ал келер жылы Петропавлда екі жаңа дене шынықтыру-сауықтыру кешені тұрғызылады.
Авторлары: Айдарбек Айтмұхамбетұлы, Төлеген Иманов
