Алматы онкологиялық орталығында KiroOncology атты роботтандырылған жүйе енгізілді.
Алматыда онкологиялық науқастарға арналған химиотерапиялық дәрі-дәрмектерді дайындауда алғаш рет арнайы робот қолданылып жатыр, деп хабарлайды inbusiness.kz сайты.
Бұл құрылғы химиопрепараттардың дозасын дәл есептейді, компоненттерді араластырады және қолданылған материалдарды автоматты түрде жояды. Робот штрихкодтар мен кескін базасы арқылы әр препаратты сәйкестендіреді, осылайша адам қателігін болдырмайды. Бұған дейін мұндай технология тек Еуропа мен АҚШ-та қолданылып келген.
Жүйе екі механикалық манипулятормен жабдықталған: олар дәріні флакондарға құйып, қажет жағдайда араластырады. Процесс аяқталған соң пайдаланылған бөтелкелер мен шприцтер герметикалық контейнерде автоматты түрде жойылады. Бұл технология медициналық қызметкерлердің цитотоксикалық заттармен байланысқа түсу қаупін азайтады.
Роботпен қатар орталықта Kiro Assist жүйесімен жабдықталған қауіпсіздік ламинарлық бокстар жұмыс істейді. Мұнда препараттар қолмен дайындалғанның өзінде барлық кезеңдер электронды бақылаумен өтеді: сәйкестендіру, өлшеу, визуалды тексеру және құжаттау. Сарапшылар бұл технологияның Қазақстандағы онкологиялық көмекті заманауи, дәл және қауіпсіз етуге бағытталған маңызды жаңалық екенін айтады.
