Өзбекстан футбол қауымдастығы Йоахим Левпен келіссөздер бастағанын хабарлады .
Өзбекстан футбол қауымдастығы 2014 жылғы әлем чемпионы атанған Германия құрамасының экс-бас бапкері Йоахим Левпен келіссөздер жүргізіп жатқанын ресми түрде растады.
64 жастағы маман 2021 жылы Германия құрамасынан кеткеннен кейін, бапкерлік қызметтен үзіліс алған. Осы уақыт ішінде оған бірнеше ұлттық құрама мен клубтан ұсыныс түскенімен, ресми түрде ешбір командаға жетекшілік етпеді. Енді Йоахим Лев Азия құрлығындағы үлкен халықаралық жобамен алаңға қайта оралуы мүмкін.
Егер тараптар келісімге келсе, Лев Өзбекстан құрамасының тізгінін ұстайды. Бапкерлік штабқа жергілікті маман Тимур Кападзе қосылады деп жоспарланып отыр. Кападзе — Өзбекстан футболының танымал өкілі, соңғы жылдары жастар құрамаларын жаттықтырған.
Айта кетейік, Йоахим Лев Германия құрамасын 2006 жылдан 2021 жылға дейін басқарды. Оның жетекшілігімен аталмыш құрама 2014 жылы Бразилияда өткен әлем чемпионатын жеңіп алды. Ал, Левтің өзі сол жылы ФИФА нұсқасы бойынша "Жылдың үздік жаттықтырушысы" атанды. Сондай-ақ Германия құрамасы оның тұсында 2010 жылғы әлем чемпионатының жартылай финалына, ал 2008 және 2016 жылғы Еуропа чемпионаттарында финал мен жартылай финалға дейін жеткен.
Өзбекстан құрамасы әлем чемпионатына нәтижелі өнер көздеп отыр. Бұл мақсатқа жету үшін футбол федерациясы тәжірибелі және беделді маманды шақыру арқылы құраманың деңгейін жаңа сатыға көтеруге ниетті.
