Сайрам ауданының денсаулық сақтау жүйесі жаңғыру үстінде. Аудан әкімі Арман Сәбитов аудандық орталық ауруханада жүргізіліп жатқан күрделі жөндеу жұмыстарының барысымен арнайы танысты.
Маңызды әлеуметтік нысан саналатын аурухананың жаңарту қарқыны мен сапасына баса назар аударған әкім мердігер мекемеге нақты тапсырмалар беріп, жұмысты сапалы әрі мерзімінде аяқтаудың маңыздылығын атап өтті.
Бұл жөндеу тек ғимараттың сыртын бүтіндеу ғана емес, ауданның денсаулық сақтау саласын жаңа деңгейге көтеруге бағытталған қадам. Аурухана жөндеуден кейін заманауи медициналық құралдармен жабдықталып, тұрғындарға сапалы әрі қолжетімді медициналық қызмет көрсетуге мүмкіндік береді. Сонымен қатар, дәрігерлердің де еңбек жағдайы жақсарады. Бұл өз кезегінде көрсетілетін қызмет сапасының артуына ықпал етеді.
Жөндеу жұмыстары аудан экономикасына да оң әсерін тигізіп отыр. Құрылыс пен жаңарту процесіне жергілікті жұмысшылар тартылып, өңірдегі кәсіпкерлер мен құрылыс саласындағы мамандарға жұмыс көзі ашылды. Жобаның жүзеге асуы шағын және орта бизнестің дамуына, әсіресе құрылыс материалдарын жеткізу, техникалық қызмет көрсету, көлік және тамақтандыру сияқты салаларда жергілікті кәсіпкерлердің белсенділігін арттыруға себеп болды
Аурухананың жаңартылуы медициналық инфрақұрылымды жақсартып қана қоймай, болашақта ауданның әлеуметтік әлеуетін көтеруге де әсер етпек. Сапалы медицина – сапалы өмірдің кепілі. Тұрғындардың денсаулығы жақсы болса, еңбекке жарамдылығы артады, бұл аудан экономикасына жанама түрде оң ықпал етеді. Сонымен қатар, ауданға жаңарған аурухана негізінде тар бейінді мамандарды тарту, заманауи зертханалар мен диагностикалық орталықтар ашу мүмкіндігі туындайды.
Аудан басшысы аурухананың қазіргі қалпын көріп, бірқатар кемшіліктерге назар аударды. Ол жұмысты жүйелі жүргізуді, пайдаланылатын материалдардың сапасына мән беруді және жергілікті халықтың күтетін сеніміне лайық нәтижеге қол жеткізуді тапсырды. Себебі бұл нысан – тек емдеу орны емес, халықтың өмір сүру сапасын айқындайтын басты тетіктердің бірі.
Орталық аурухананың жаңаруы – Сайрам ауданында жүзеге асып жатқан әлеуметтік жобалардың бірі ғана. Бұл бағыттағы жұмыстар аудан экономикасының өсіп, тұрақты даму үстінде екенін көрсетеді. Инфрақұрылым, денсаулық сақтау, білім, кәсіпкерлік – бәрі де өзара байланысты. Сондықтан әрбір бастама тұрғындардың әл-ауқатын арттырып қана қоймай, ауданның болашағына салынған берік инвестицияға айналуда.
С.АБЫЛБЕКОВА
