Бұл жобаға 50 жастан асқан жұмыссыз азаматтар зейнеткерлік жасқа толғанға дейін қатыса алады, деп хабарлайды inbusiness.kz сайты.
2025 жылғы 1 шілдедегі жағдай бойынша "Күміс жас" жобасы бойынша 12,4 мың адам жұмысқа орналастырылды. 2025 жылы осы бағыт бойынша барлығы 23,8 мың адамды жұмысқа орналастыру жоспарланып отыр.
"Күміс жас" жобасы бойынша жұмысқа орналасқандардың ең көп саны келесі облыстарда байқалады: Алматы – 1 118 адам, Жамбыл – 1 032 адам, Ақтөбе – 1 007 адам, Қарағанды – 1 004 адам және Жетісу облысында – 1 040 адам.
Қатысушылардың басым бөлігі ауыл шаруашылығы саласында – 36%, қызмет көрсетуде – 23%, қоғамдық тамақтандыруда – 21% жұмыспен қамтылған.
Жобаға қатысу үшін мансап орталығына өтініш беру қажет.
"Күміс жас" жобасына қатысу мерзімі аяқталғаннан кейін жұмыс беруші зейнеткерлік жасқа толмаған адамды кемінде 1 жыл мерзімге тұрақты жұмыс орнына, сондай-ақ зейнеталды жастағы адамды зейнеткерлікке шыққанға дейін жұмысқа орналастыруға міндетті.
Жобаға қатысу ұзақтығы 36 айдан (3 жыл) аспайды және осы уақыт аралығында қатысушылардың жалақысы мемлекет тарапынан субсидияланады.
"Күміс жас" жобасын қаржыландыруды еңбек мобильділігі орталығы жұмыс берушінің жоба аясында жұмысқа орналастырылған жұмыссыздарға еңбекақы төлеуге жұмсаған шығындарының бір бөлігін өтеуге субсидиялар беру жолымен жүзеге асырады. Субсидиялар мөлшері: жұмыстың бірінші жылында жалақы мөлшерінің 70%-ын (бірақ 30 АЕК-тен аспайтын), жұмыстың екінші жылында жалақы мөлшерінің 65%-ын (бірақ 30 АЕК-тен аспайтын), жұмыстың үшінші жылында жалақы мөлшерінің 60%-ы (бірақ 30 АЕК-тен аспайтын).
Ақтөбе облысында 2025 жылы "Күміс жас" жобасы бойынша 1 205 адамды жұмысқа орналастыру жоспарда бар.
