Алматының тауларындағы демалыс нысандары халықаралық деңгейдегі курортқа айналады, деп хабарлайды 24kz.
Мұндай таулы аймақта орналасқан шипажайларды әлемнің әр түкпірінен кездестіруге болады. Бірақ Алматы тауларының артықшылығы қаланың дәл іргесінде болғандығы. Орталық Азия бойынша шаһарға ең жақын орын тепкен осы Алматы таулары. Мұндай курорттық жерлер Ташкент, Баку, Бішкек пен Тбилисиде бар. Бірақ инфрақұрылымы дәл мұндай емес. Ондағы әсемдікті көру үшін кәдімгідей жол жүріп барасыз. Енді жүзеге асырыла бастаған Алматы тау кластерін дамыту жөніндегі кешенді жоспары туристердің саяхатын қызықты әрі есте қалатындай етуді көздейді. Жоба бойынша электр желісін тарту, кәріз жүйесі мен газ жүргізу, жол салу сияқты ауқымды жұмыстар жоспарланған. Айта кетейік, былтыр Алматыға 2,5 миллионға жуық турист келген.
Айбол Мұратхан, қалалық туризм басқармасының бас маманы:
- Алматыдан тауға бару үшін 20-30 минут қана кетеді, ал көршілес мемлекеттерде ол одан ұзақ уақытты алады. Ал Алматыда олар тауға да бара алады, белгіленген басқа аймақтарға да жете алады. Сол себептен, туризмде әлемдік аренада өз-өзін көрсетуге тұрарлықтай қала. Бұл жоба кешені қазір қарастырылуда. Детальды бұл ақпарат бізге қашан түседі сол кезде айтатын боламыз. Қай курорттық аймаққа немесе белгіленген жерлерге кіретіні сол кезде айтылады.
