Өзбекстан құрамасының шабуылшысы Эльдор Шомуродов италиялық "Ромамен" қоштасып, түріктің "Истанбул Башакшехир" клубына ресми түрде ауысты.
30 жастағы футболшы өзінің әлеуметтік желідегі парақшасында жүрекжарды қоштасу хатын жариялап, Рим клубында өткізген жылдарын ерекше тебіреніспен еске алды.
– "Маған ұмытылмас сәттер сыйлаған клубпен қоштасатын уақыт келді. „Романың“ жейдесін кию – үлкен мәртебе болды. Бұл сапар голдарға, күреске және командаластарыммен, бапкерлер құрамымен, керемет жанкүйерлермен бөліскен ерекше сәттерге толы еді. Әр минут, әр гол және әр сабақ үшін алғысым шексіз. „Рома“ жүрегімде мәңгі орын алады. Маған сенім артқандарыңыз үшін рахмет. Енді жаңа тарау басталады. Бірақ бұл естеліктер менімен мәңгі бірге қалады", – деп жазды шабуылшы.
Шомуродовтың жаңа клубқа ауысуы жалға алу шарты негізінде жүзеге асты. Келісімге сәйкес, "Башакшехир" клубы оны 3 миллион еуроға жалға алып отыр, ал толықтай сатып алу құқығы тағы 2,7 миллион еуроға бағаланған.
Айта кетейік, Эльдор Шомуродов "Рома" сапында 2021 жылдан бері өнер көрсетті. 2024/25 жылғы маусымда ол 37 матчқа қатысып, 7 гол соғып, 5 нәтижелі пас берді. Римде өткен үш жыл шабуылшының мансабындағы маңызды кезеңдердің бірі ретінде есте қалары сөзсіз. Енді өзбек футболшысы жаңа елде жаңа белестерді бағындыруға ниетті.
