10 шілде күні Бәсекелестікті қорғау және дамыту агенттігінде аппараттық-бағдарламалық кешендер немесе такси шақыруға арналған мобильді қосымшалар арқылы көрсетілетін такси қызметтері нарығын бақылау тобының кезекті отырысы өтті, деп хабарлайды Zakon.kz.
Агенттіктің мәліметінше, жиында Яндекс Таксидің алгоритмдік баға белгілеу тиімділігіне жүргізілген аудиттің қорытындысы қаралды. Бұл тексеріс Цифрлық даму, инновациялар және аэроғарыш өнеркәсібі министрлігімен және тиісті мамандармен бірлесіп өткізілген.
"Еске салайық, бұл аудитті өткізу міндеті Яндекс Таксиге бәсекелестікке қарсы әрекеттердің алдын алуға бағытталған комплаенс шеңберінде жүктелген болатын. Аудиттің мақсаты — Яндекс сервисіндегі такси бағасын қалыптастыруға әсер ететін шарттар мен параметрлерді зерттеу. Бастапқы аудит кезінде бағаға әсер етуі мүмкін бірқатар қауіптер анықталды. Олардың қатарында — қаланың әкімшілік-аумақтық шекараларымен сәйкес келмеуі, бағаның бағадан тыс факторлар есебінен өсуі, қосымшада бағаны есептеу үшін толық ақпараттың болмауы, әуежайда жолаушыларды орналасқан жеріне қарай алалау сияқты жайттар бар", — делінген хабарламада.
Агенттіктің мәліметінше, кейбір қауіптер жойылды, ал қалғандары бойынша Яндекс оларды шешуге міндеттеме алды. Атап айтқанда, агенттік хабарламасы негізінде Яндекс+ пайдаланушыларға арналған адалдық бағдарламасының ережелері өзгертілді. Енді бұл бағдарламадан туындайтын барлық шығынды Яндекс өз мойнына алады (яғни, клиенттерге берілетін жеңілдіктер).
Сонымен қатар, Яндекстің комплаенс жүйесіне де өзгерістер енгізілді. Енді компания жүктеме жоғары уақыттарда такси бағасының негізсіз өсуіне жол бермеу, сондай-ақ жүргізушілер табысының төмендеуіне жол бермеу мақсатында кешенді шаралар қабылдауға міндеттеліп отыр.
Кездесу барысында агенттікке келіп түскен шағымдар негізінде Яндекс Такси жүргізушілерінің мәселелері қаралды.
Сондай-ақ, Яндекс Такси өкілдері 2025 жылдың 1-тоқсанына қатысты антимонополиялық комплаенс талаптарының орындалуы бойынша есеп берді.
Отырыс қорытындысы бойынша бақылау тобы мемлекеттік органдар мен Яндекс Такси үшін ұсыныстар қабылдады.
