Грек-рим күресінен Олимпиада ойындарының күміс жүлдегері Демеу Жадыраев ұзақ үзілістен соң кілемге қайта оралмақ. Бұл туралы ұлттық құраманың бас бапкері Қонысбек Төкенов мәлімдеді, деп жазады Sportbugin.kz сайтына сілтеме жасаған KAZ.NUR.KZ.
Париж Олимпиадасынан кейін кілемге шықпаған Жадыраевтың қандай жарысқа қатысатыны белгілі болды.
"Демеу қазір қарқынды дайындалуда. Ол тамыз айында Германияның Дортмунд қаласында өтетін Гран-при турнирінде бақ сынайды. Сол кезде қазіргі деңгейін бақылайтын боламыз.
Егер Жадыраев осы жарыста жақсы нәтиже көрсетсе, әлем чемпионатына қатысуға үміткерлер қатарына кіреді. Егер нәтиже болмаса, әлем чемпионатына үміткер ретінде қарастырылмайды", — деді Төкенов.
Айта кетейік, Демеу Жадыраев грек-рим күресінен 77 келіге дейінгі салмақта Париж Олимпиадасының күміс жүлдегері атанды. Содан бері балуан ешбір жарысқа қатысқан жоқ.
Мәтіннен қате тапсаңыз, бізге жазыңыз
