Осы уақытқа дейін аяқталған ауыз су жүйесінен бір жұтым судың шықпауы көптің күдігін күшейткен.
Жамбыл облысында екі миллиард теңгеге жуық қаражатқа тартылған су құбырынан тамшы су тамбаған, деп хабарлады 31 арнаның Информбюро ақпараттық бағдарламасы.
Ерте көктемде ел игілігіне берілуі тиіс тіршілік нәрі аңызға айналды дейді ауылдықтар. Көпшілік қомақты қаржы құмға сіңді ме деп күдіктенеді. Өйткені Бектөбе және Қызылшаарық алқаптары жыл басынан бері ауылдық округтен Тараз қаласының құрамына енген. Бірақ аудан тұсында басталған іс орта жолда тасталған дейді жұрт.
Аптап ыстықта аңқасы кепкен алқап жұрты ауыз су тартамыз деп алдап кеткен атқарушы билікке ашулы. Тірлігі тиянақсыз мердігердің мәселесін мың сан барып айттық дейді. Бірақ елеген ешкім болмапты.
Шыдай-шыдай шілдеде шыдамы шытынаған жұрт жазғы демалысқа келген мәжіліс депутатының әлеуметтік парақшасын оқып аң-таң болыпты. Сайлаушыларының алдында қарабет болдым деген халық қалаулысы, аудан басшысының әлдеқашан біткен істі созбаққа салғанын айтып жазба жариялаған.
Осы уақытқа дейін аяқталған ауыз су жүйесінен бір жұтым судың шықпауы көптің күдігін күшейткен. Ал мамандардың жауабы, мәжіліс депутатының бұл жазбасы жанашырлықтан бұрын популизм дегенге саяды. Су жүйесінің нақты не себепті созбаққа созылуын айтпаса да, әне-міне су беруге дайынбыз дейді.
Жақында ғана қалаға енген қос алқаптың тұрғындары қалаға лайық тұрмыс кешуді күтеді. Бірақ оған біраз уақыт керек сыңайлы. Өйткені Тараз қаласы әкімдігі су жүйесі қала құрамына өтпегенін жеткізді.
