Шекара маңындағы елді мекендерге барған Сенат депутаттары бірқатар мәселеге қанықты.

Сенат депутаты Жанболат Жөр­генбаев Алматы облысындағы Кеген ауданында болды. Сонымен қатар ол Қарқара ауылын­дағы Қырғызстанмен мемлекеттік шекара аймағында болып, өткізу бекетін тексерді.

«Шекаралас аудандарда жүйелі даму қадамдарын жасау керек. Сапалы жол, сумен жабдықтау және заманауи өткізу бекеттері – жайлы өмірдің кө­рінісі емес, қауіпсіздік пен болашақ дамудың мәселесі. Мұндай міндеттерді мемлекеттік деңгейде шешу қажет», деп атап өтті Ж.Жөргенбаев.

Депутат сондай-ақ «Көкпек–Кеген–Түп» және «Жалағаш–Көлсай–Саты» жол­дарының жай-күйімен танысты. Бұл бағыттар таулы ауылдарға барғанда және туризмді дамытуда аса маңызды. Сена­тор су ресурстарын тиімді пайдалану және ауыл ша­руашылығын қолдауға көмек­тесе­тін суару және дренаждық нысандарға да барды.

Ал сенатор Талғат Жүнісов Ақмола облысындағы Шортанды және Зеренді аудандарының тұрғындарымен кездесті. Ол алдымен Шортанды ауданындағы Бозайғыр ауылында 300 орындық дене шы­нықтыру-сауықтыру кешенінің құрылысымен танысты. Бұдан соң депутат жергілікті жалпы білім беретін мектепте болып, педагогикалық ұжым­мен кездесті. Сенатор ауылды дамытуда спорт пен білім беруден бастап инженерлік инфрақұрылымға дейін кешенді көзқарас қажет екенін атап өтті.

Зеренді ауылында болған кезде депутат ауданы 1 379 шаршы метр, құны 1 млрд теңгеден асатын жаңа тарихи-өлкетану мұражайының құры­лысымен танысты. Көктерек ауылында ұзындығы 13,5 км су құбыры мен су жинау желісін салу бойынша жұмыс­ты көріп шықты.

Сенат депутаттары Нұрлан Бекна­заров пен Айгүл Қапбарова Шымкент қаласының тұрғындарымен, қоғамдық кеңес мүше­лерімен және қалалық мәслихат депутаттарымен бірқатар кездесу өткізді.

«Сенат пен мәслихаттардың бірлес­кен жұмысы өңірлердің алдында тұрған ең өзекті мәселелерді уақтылы анық­тауға және шешуге мүмкіндік береді. Мемлекет басшысы Қасым-Жомарт Тоқаев алға қойған міндеттерді биліктің барлық дең­гейінің өзара тығыз іс-қимылы арқасында ғана тиімді іске асыруға болады», деді Н.Бекназаров.

Сондай-ақ сенаторлар Шымкентте азаматтарды жеке қабылдады. Онда тұр­ғындар азаматтардың құқықтарын қор­ғау, сот орындаушыларының қызметі, қарыз­дарды қайтару және іс жүргізу ережесін сақтау мәселелерді көтерді. Сена­торлар өтініштерді тыңдап, жедел әрекет ету үшін салалық мемлекеттік орган­дардың өкілдерін шақырды. Әрбір жағдай бойынша тапсырмалар беріліп, бақылауға алынды. Қалалық қоғамдық кеңестің мүшелерімен кездесуде мемлекеттік бағдарламаларды іске асыруға мониторинг жасау және заң шығару үдерісіне қатысудағы азаматтық қоғам институттарының рөлі талқылан-ды. Сенаторлар қоғамдық кеңес­тердің өкі­леттіктерін кеңейту және қоғамдық бақы­лау тетіктеріне қатысты заңнамадағы соңғы өзгерістер туралы айтты.

Депутат Серік Өтешов Қарағанды облы­сында өңірлік дамудың негізгі мәселелеріне арналған бірқатар кездесу өткізді. Абай ауданында аграрлық секторды қолдау, Қарағандыда өңірді цифрландыру және инновациялық трансформациялау мәселелері тал­қыланды. Сенатор аграршылармен және аудан депутаттарымен кездесуде ауыл шаруашылығы мақсатындағы жерлерді неғұрлым тиімді пайдалану қажеттігін айтты. Ал тұрғындар отандық агроөнеркәсіп өндірісінің бәсекеге қабілеттілігін арттыруға мемлекеттік субсидияны көбейту қажеттігін жеткізді.

Сондай-ақ С.Өтешов Қарағандыда «Қолжетімді интернет» ұлттық жобасын іске асыру барысымен және еліміздің жетекші цифрлық орталықтарының бірі Terricon Valley ІТ-хабының қызметімен танысты. Өңірде 342 ауылдық елді мекен бар, оның 94-і әлі де интернетке қосылмаған.

Сонымен қатар Сенат депутаттары Ольга Перепечина мен Әсем Рахметованың Солтүстік Қазақстан облысындағы, Сүйін­дік Алдашевтың Маңғыстау облысындағы сапарлары жалғасып жатыр.