Маңғыстау облысындағы Кендірлі зауытында теңіз суын тұщыту процесі басталды .
Бұл ақпаратты "ҚазМұнайГаз" ұлттық компаниясы жариялады, деп жазады inbusiness.kz сайты.
Қуаты тәулігіне 50 мың текше метр болатын кәсіпорында 30 мамыр күні құрылыс жұмыстары аяқталды. Суды тұщыту, тұзсыздандыру және минералдандыру цехтары, сорғы станциясы, екі қосалқы станция, жөндеу-механикалық цех, гараж, қоймалар, зертхана, өрт сөндіру бекеті, қазандық салынды.
Сонымен қатар инженерлік-коммуникациялық инфрақұрылым – ұзындығы 80,1 шақырым электр беру желісі, жалпы ұзындығы 201,4 шақырым екі тармақты магистралды су құбыры, 48,1 шақырымдық газ құбыры және 40,1 шақырымдық автожол салынып бітті. Жобаның теңіз бөлігі бойынша теңіз түбіндегі траншеяға полиэтилен құбырлары төселді. Кәсіпорында әлемнің жетекші өндіруші компаниялардың озық технологияларымен жабдықталған.
Теңіз суын тұщытуға арналған өндірістік желі тексеруден өткізіліп жатыр. Бұл процесс 72 сағатқа созылады. Сынақ іс-шаралары сәтті аяқталған кезде зауыт толық жұмыс күшіне көшеді.
Бүгінгі таңда Жаңаөзен қаласына суды екі компания "Магистральды су құбыры" ЖШС мен "Су өндіру және тасымалдау басқармасы" ЖШС жеткізіп отыр. Жаңаөзенге қазіргі бар көздерден беріліп отырған судың жоспарлы көрсеткіштерін, сондай-ақ халықтың оны тұтынудың маусымдық факторын ескере отырып, "Кендірлі" зауыты суды бастапқы кезде "қосымша режимде" өндіретін болады, яғни жетіспейтін көлемін қамтамасыз етеді.
Тұщытылған теңіз суы барлық қажетті талдау мен зертханалық зерттеулер жүргізілгеннен кейін ұзындығы 100,7 км құбыр арқылы Жаңаөзен қаласына жеткізу үшін "Өзенинвест" мемлекеттік коммуналдық мекемеге жіберіледі.
Жоба стратегиялық маңызға ие. Жаңа зауыт іске қосылғаннан кейін Жаңаөзен тұрғындары мен іргелес жатқан елді мекендер ауыз сумен қамтамасыз етіледі. Сондай-ақ нысан "Астрахань-Маңғышлақ" магистралды су құбырына жүктемені азайтып, өңірдегі өнеркәсіп әлеуетін дамытуға ықпал етеді.
Жоба Мемлекет басшысының тапсырмасы бойынша іске асырылып жатыр. Барлық тексеру жұмыстары толықтай аяқталғаннан соң нысан Маңғыстау облысы әкімдігінің коммуналдық меншігіне беріледі.
