Спорт журналисі Аслан Каженов танымал ресейлік спортшының Қазақстан азаматтығын алғанын мәлімдеді.

Бұл туралы Caravan.kz медиа порталы хабарлайды.

Журналист әлеуметтік желідегі парақшасында қысқы олимпиада қарсаңында дайын спортшыны ел атынан өнер көрсетуге шығару салу — ең оңай шешім екенін айтып, өткеннен сабақ алуға шақырды.

«Мына қызды неге әкелдіңдер?!

Тағы бір ресейлік спортшы көк паспортымызды алды. Нақтырақ айтқанда, Елизабета Голубева бұдан былай Қазақстан азаматшасы саналады. Тіпті, Халықаралық конькишілер одағы оған 2025 жылдың 5-шілдесінен бастап біздің елдің атынан өнер көрсетуге рұқсат берді.

Иә, Елизабета – мықты спортшы. Әлем чемпионаты мен Еуропа чемпионатында жүлдеге іліккен. Бізге де медаль әкелер. Бірақ, осы арқылы кімді алдаймыз? Ол жеңістерге шынайы қуана алмасақ, ол жеңістер өз өрендеріміздің жетістігі болмаса, ол жеңістер отандық жүйенің жемісі болмаса, қажеті қанша? Бұған дейін де талай спортшы осылай келді. Миллиондаған жалақы мен сыйақыны алды да тарихи отандарына тайып тұрды. Сондай жетістік керек пе бізге? Неге өткеннен сабақ алмаймыз?

Қысқы олимпиадаға жарты жыл қалғанда осылай жанталасқанымыз, қай сасқанымыз? Неге жылтыр әрі жеңіл медальға құмармыз? Өзіміз неге чемпиондарды өсірмейміз? Өзіміз неге әрекет қылмаймыз? Дайын спортшыны әкеле салу, ең оңайы ғой. Ертең осы қыздың нәтижесімен керемет қылып есеп береміз. Бөлінген миллиарттарды жылы жабамыз. Бәрі «красавчик» болады. Бірақ, нақты нәтиже нөл. Нақты іспен ешкім айналыспайды. Өкініштісі, өте қысқа мерзімді ойлаймыз. Яғни, дәл қазір жүлде алуымыз керек. Ал, ары қарай ол спорттың тағдыры, жалпы отандық спорттық тағдыры ешкімді алаңдатпайды. Осылай өз-өзімізді 35 жыл бойы алдап келдік. Тағы алданып жатырмыз. Алдана береміз де…», — деп жазды ол.

Журналистің жазбасына желі қолданушылары түрлі пікір жазуда. Олардың басым көпшілігі бұл жаңалыққа наразылық танытуда.

«Бұндайларды ел абыройы үшін әкеліп жатқан жоқ, ол рас. Көксегендері белгілі көздері қанталап сол бір ақша», «Сасқан үйрек артымен жүзеді дегендей болып тұрғой! Айтарға сөзім жоқ», «Көк паспорттың құны кетті ме», — деп жазды олар.