Мәжіліс спикері, «AMANAT» партиясының төрағасы Ерлан Қошанов бастаған бір топ депутат жұмыс сапарымен Шығыс Қазақстан облысына барды, деп хабарлайды 24KZ. Делегация бірқатар әлеуметтік нысанды аралап, кәсіпорындардың жұмысымен танысты.
Соның бірі – «Лу Бань» шеберханасы. Ол Дәулет Серікбаев атындағы Шығыс Қазақстан техникалық университетінде орналасқан. Мұнда студенттер электромобиль, ақылды көлік жүйелері және заманауи автотехнологиялар бойынша білім алады. Аталған шеберхана Қазақ-Қытай басшыларының келісімі негізінде ашылған. «Біз осы жоба арқылы әлемдік технологияларды елге әкеліп, жастарды болашақ техникалық жоғары кәсіби мамандықтарға даярлаймыз. Бұл Мемлекет басшысы айтқан «Еңбек адамы – экономиканың басты тірегі» деген сөзінің іс жүзінде орындалуы», – деді Мәжіліс төрағасы.
Бұдан кейін сапар «Үлбі ТВС» ЖШС-да жалғасты. Орталық Азиядағы теңдесі жоқ зауытта уран отыны өндіріледі. Жылдық қуаты 200 тонна. Зауыт – Қазақстан мен Қытайдың бірлескен жобасы. Қазіргі таңда мұнда 200-ге жуық адам еңбек етіп жатыр. Әрмен делегация «Алтай» көтерме-тарату орталығына бас сұқты. Кешен ауыл шаруашылығы өндірушілерін қолдап, азық-түлік қауіпсіздігін қамтамасыз етуге бағытталған.
