Павлодардағы қарттар үйінде тұратын 93 жастағы Сағадат Жұмабаев қажылыққа деп жинап келген қаражатын мүмкіндігі шектеулі балаларға берді, деп хабарлайды "ҚазАқпарат" ХАА.

Агенттік тілшісінің жазуынша, жалпы сомасы 3,6 млн теңге қаражатты қария он жыл бойы жинап келген. Кейінгі уақытта денсаулығы жиі сыр беруіне әрі жасының үлкендігіне байланысты ұзақ сапардан бас тартуына тура келген.

"Меккеге барамын деп ұзақ жылдар зейнетақымнан жырып ақша жинадым. 2022 жылы шетелге шығу үшін төлқұжат алдым. Өкінішке қарай, сол жылы қажылыққа баратындардың жасы 65-тен аспауы керек деген талап қойылып, мені туроператорлар алмады. Одан соң денсаулығым сыр беріп, жүріп-тұруым ауырлай бастағанын сездім. Оның үстіне таныс адамдар ол жаққа бару үшін жаныма адам ертіп жүруім керектігін айтты. Ақыр-соңы қасиетті сапардан бас тартуыма тура келді", — дейді Сағадат ата.

Қария отасқан жарымен ұзақ жыл түтін түтеткен. Алайда тағдырдың жазуымен араларында бала болмаған. 2009 жылы зайыбы қайтыс болған соң жалғыз қалады. Інісі 69 жасында өмірден озған. Ал анасы 98 жасында дүние салыпты. Сондықтан өзінің ұзақ өмір сүруінің сырын анасының тегінен дарыған деп есептейді.

"Кейінгі уақытта шешем түсіме жиі кіреді. Ананың орны ыстық екен, оны үнемі сағынамын. Ойлана келе, көп жыл бойы жинаған қаражатымды мүгедек бала асырап отырған отбасыларға беруді ұйғардым. Жолдастарымнан сұрастыра жүріп дертке шалдыққан балаларды тауып, оларды анасымен бірге бір жерге жинадық.

Тірнектеп жиған 3,6 млн теңгемді 120 мың теңгеден бөліп, 30 баланың анасына ұстаттым. "Қалқаларым, бұл – түн ұйқысын төрт төліп, баласының өмірі үшін күрескен аналар еңбегінің өтеуі деп түсініңдер" деп атап айттым. Ананың аялы алақанын, оның өз перзентін өсіріп-жеткізудегі еңбегін дүниеде еш нәрсемен өлшей алмайсың", — дейді тыл ардагері.

Сағадат Жұмабаев қазіргі Тереңкөл ауданында шөп шабушы, колхоз есепшісі, бригадир, кірпіш зауытының шебері, қойма меңгерушісі қызметтерін атқарған. Кейін Павлодарға көшіп келіп, зейнетке шыққанға дейін алюминий және трактор зауыттарында еңбек еткен. 1988 жылдан бері зейнетте.

Мәтіннен қате тапсаңыз, бізге жазыңыз