Сауда саласына енгізілген цифрлық жобалар — кәсіпкерлерді қағазбастылықтан босатты. Зертханалар мен ірі кәсіп иелері барлық тиісті құжаттарды соңғы жылы Техникалық реттеудің ақпараттық жүйесі арқылы қиындықсыз алып келеді.
Мәселен, бұл жүйеде 5 бөлім бар. Алғашқысы «Акредиттеу» бөлімі, мұнда 1 жыл ішінде 8 мыңнан астам қызмет көрсетілген. Ал «сәйкестікті бағалау» бөлімінде 150-ге жуық құжат шығарылып, 620 сертификаттау модулі іске қосылды. «Метрология» бөлімінде — Өлшеу құралдарын тексерудің электрондық есебі цифрланған. «Мемлекеттік бақылау» бөлімінде жауапты органдар ұсыныстар мен хабарландыруларды жүктейді. Сондай-ақ «стандарттау» бөлімінде барлық 9412 ұлттық стандарт жаңа форматта цифрландырылған. Айта кету керек, бұл жүйе арқылы шығарылған әрбір құжатта QR-код бар, сол арқылы оның түпнұсқалығын растауға болады.
Әсет Өтеғалиев, ҚР СИМ Тауарларды таңбалау және цифрлық трансформациялау департаменті директорының орынбасары:
1 жыл ішінде көптеген жетістіктерге жетті. 150 мың тіркелушісі бар. Күніне 13 мыңнан астам құжаттар шығарылады. Бұл жемқорлықпен күресуге өте жақсы инструмент деп атауға болады.
Ақниет Балтанова
