Экономист Дональд Трамп енгізген кедендік баждың Қазақстан экономикасына әсері қандай болатыны жайында әңгімеледі .
Қазіргі саяси-экономикалық жағдай АҚШ қандай шешім қабылдаса – жағдай сондай болатынын көрсетіп отыр. Бұл жағдай – күшті елдің өз тәртібін өзгелерге таңуының мысалы, деді экономист Әнуар Нұртазин Информбюро порталына берген сұхбатында.
Оның сөзінше, бұл мәселеде АҚШ-тың тек Қазақстанға емес, жалпы әлемге бағытталған күш көрсетуі, саяси ескертуі жатыр.
"Қазақстан – бұл ретте жеке дара нысана емес. Мұнда АҚШ "әлсіз, экономикасы шағын, дамушы елдер үлкен державаның айтқанына бағынуы керек" деген ұстаным танытып отыр. Бұл – күштінің диктаты және мәселе – осымен тәмам", – деді экономист.
Оқи отырыңыз: Сауда министрлігі АҚШ-тың жаңа тарифіне қатысты мәлімдеме жасады
Әнуар Нұртазиннің пікірінше, баж салығының Қазақстанның экспорттық секторға тікелей әрі күшті әсері болмауы мүмкін.
"Экспорттың АҚШ бағытындағы көлемі физикалық тұрғыда азая қоймайды деп болжауға болады. Тек бағалық жағынан аздаған төмендеу болуы мүмкін. Ал логистикалық есептеулерді қайта бағалау болса – бұл процесс онсыз да үздіксіз жүріп жатыр. Алайда біз үшін басты кедергі – география. Неге десеңіз, Қазақстан Қытай, Ресей, Ауғанстан және Иран секілді елдердің арасында орналасқан. Ал бұл мемлекеттердің барлығы АҚШ тарапынан бұрын-соңды болмаған санкциялық қысымға ұшыраған. Ал Қазақстан осы ахуалдың геосаяси тұтқынына айналып отыр. Сондықтан ұзақ мерзімді оң перспективалар туралы айту әзірге қиын", – деді сарапшы.
Еске салайық, АҚШ президенті Дональд Трамп Қазақстаннан келетін тауардың бәріне 25 пайыз кедендік баж салығын енгізді. Ол 1 тамыздан бастап әрекет етеді.
Экономист Әнуар Нұртазиннің сұхбатын Информбюро порталынан оқи аласыздар.
Оқи отырыңыз:
"Қайтадан Ресей мен Қытайға тәуелді етуі мүмкін". Экономист Трамптың Қазақстанға баж салығын салуы туралы
