Ойын Қазақстан уақыты бойынша сағат 22:00-де басталады.
Бүгін, 8 шілде Чемпиондар лигасының іріктеу кезеңінің алғашқы айналымы аясында словениялық "Олимпия" мен алматылық "Қайрат" командалары кездеседі. Алғашқы матч Словения астанасы Любляна қаласында ұйымдастырылады.
Алматылық "Қайрат" үшін Чемпиондар лигасы жыл сайынғы үйреншікті дода емес. Сондықтан бұл турнирдегі әр кездесудің құны да, маңызы да ерекше. Клуб осы уақытқа дейін Еуропаның басты додасының іріктеу кезеңінде небәрі үш қарсыласқа тап болды. Яғни бар болғаны алты матч өткізген. Енді төртінші қарсылас – словениялық "Олимпия".
"Қайраттың" Чемпиондар лигасындағы алғашқы қадамы 2005/06 маусымында басталды. Ол кезде команда Словакияның "Артмедиясына" қарсы алғашқы іріктеу кезеңінде бақ сынады. Алматылықтар өз алаңында 2:0 есебімен жеңіске жеткенімен, қарымта кездесуде 1:4 есебімен жеңіліп, жалпы есепте 3:4 нәтижесімен келесі кезеңге өте алмады.
Келесі мүмкіндік араға 16 жыл салып 2021/22 маусымында келді. Бұл "Қайрат" үшін тарихи жыл болды. Дәл осы маусымда команда Еурокубоктарда алғаш рет топтық кезеңге шықты. Дегенмен бұл Чемпиондар лигасы емес, Конференциялар лигасы еді. Алдымен алматылықтар Израильдің "Маккаби" (Хайфа) клубын 3:1 есебімен сүріндіріп, екінші раундта Сербияның әйгілі "Црвена Звездасымен" жолықты. Тағы да өз алаңында жеңіске жеткенімен (2:1), Белградта 0:5 есебімен алматылықтар ойсырай ұтылып, жарысты ерте аяқтады.
Осы уақытқа дейінгі үш іріктеу раунды нәтижесінде "Қайрат" бір рет келесі кезеңге өтіп, екі рет жарыстан шығып қалған. Алты ойынның қорытындысы — үш жеңіс, бір тең ойын және екі жеңіліс.
Енді алматылық команданың алдында жаңа белес тұр. Словения чемпионына қарсы алғашқы ойын сырт алаңда өтеді. Бұл жолы қалай болмақ? Уақыт көрсетеді. Бірақ бір нәрсе анық — “Қайраттың” Чемпиондар лигасындағы әрбір ойыны қазақ футболы үшін үлкен оқиға.
Айта кетейік, қарымта матч 15 шілде күні Алматыда өтпек.
