Екібастұзда жасөспірім суға батып кеткен. Құтқарушылардың жұмысын қолайсыз ауа райы қиындатып отыр, деп хабарлайды KAZ.NUR.KZ Pavlodarnews.kz-ке сілтеме жасап.
Басылымның облыстық ТЖД баспасөз қызметіне сілтеме жасап хабарлауынша, Солнечный кентінің маңында "Шандықсор" жасанды көлінде 4 шілдеде сағат 16:10 шамасында тыйым салынған жерде шомылып жүрген кезде суға батып кеткен 2009 жылы туған баланы іздеу жұмыстары жүріп жатыр.
Баланы іздеуге Жедел-құтқару жасағының күштері 6 қызметкер, 2 техника, 2 жүзу құралы, сондай-ақ, эхолот тартылды. Іздеу шараларына қолайсыз ауа райы кедергі келтіріп жатыр.
"Қатты жел мен толқындар кедергі жасап жатыр. Осыған қарамастан, сүңгуірлер жұмыстарын жалғастыруда", — дейді департамент өкілдері.
Павлодар облысы ТЖД жабдықталмаған жерлерде шомылу өте қауіпті екенін еске салады.
