Ақтөбеде 20 миллион теңгеге бүйрегін сатпақ болған адамға қатысты іс аяқталды. Ол рақымшылықпен босатылды, — деп хабарлайды Massaget.kz тілшісі.
Ақтөбедегі №2 сотта жергілікті тұрғынға қатысты қылмыстық іс қаралды. Ер адам әлеуметтік желіге өзінің бүйрегін сату туралы хабарландыру жариялап, 20 миллион теңге сұраған.
Оның ұсынысына ақтөбелік әйел жауап берген. Біраз уақыттан соң ер адам ота алдындағы медициналық тексерістен өту үшін қалаға жеткен. Алайда ол 7,5 миллион теңгені алып жатқанда ұсталды.
Сотта айыпталушы кінәсін толық мойындап, қылмыстық істі тоқтатуды сұрады. Ол негіз ретінде Қазақстан Конституциясының 30 жылдығына орай қабылданған рақымшылық туралы заңды келтірген. Прокурор да бұл өтінішті қолдады.
Сот іс материалдарын, куәгерлердің жауаптарын және сараптамалар қорытындысын зерттей келе, оны қылмыстық жауапкершіліктен босатуға болады деген шешімге келді.
Сот шешімі ҚР ҚК 78-бабының 1-бөлігі, рақымшылық туралы заң және ҚР ҚПК 35-бабының 1-бөлігінің 3-тармағына сәйкес қабылданып, іс ресми түрде тоқтатылды.
Сот шешімі әлі заңды күшіне енген жоқ.
Instagram парақшамызға жазылып, ең қызықты ақпараттарды бірінші болып оқыңыз!
