Заты бар да, аты жоқ тұрғын үй Петропавлдың орталығында орналасқан .
Петропавлда еш жерде тіркелмеген, ешкімнің меншігінде жоқ үй табылды, деп хабарлады 31 арнаның Информбюро ақпараттық бағдарламасы.
"Ауада" тұрған көпқабатты баспана 33 жыл бұрын бой көтерген екен. Тұрғындары кішкене жел тұрса апталап жарықсыз отырамыз деп күйінеді. Өйткені, қырық жамалған электр желілері әбден тозған. Ал тұрғын үй ешкімнің балансында болмағандықтан әкімдік те, жарық жеткізуші компания да желілерді жөндемейді.
Заты бар да, аты жоқ тұрғын үй Петропавлдың орталығында орналасқан. Халық тоқсаныншы жылдардың соңында салынған баспанамыз ешкімнің меншігінде жоқ деп қапалы. Соның кесірінен жарық, су өшсе ақауды өз күшімізбен жөндейміз деп отыр.
"Тоқсаныншы жылдардың соңындағы тоқырау жылдарында біздің құжаттарымыз жоғалып кетіпті. Содан бері үйіміз қалада тіркелмеген. Енді балансқа ал десек, ешкім бас қатырғысы келмейді", – дейді Петропавл қаласының тұрғыны Татьяна Татваева.
Қазір жүзге жуық отбасы жаңбыр жауып, жел тұрса жарық өшпесе екен деп тілейді. Өйткені, тұрғындар электр желілерін қайта-қайта ауыстырып, көп шығынға батқан. Көпшілік коммуналдық төлемдерді кешіктірмей аударамыз деп отыр. Бірақ апат кезінде жауапты компанияны шақыра алмай қиналатындарын айтады.
Электр қуатын тарататын компанияның өкілдері еш жерде тіркелмеген үйге жөндеу жұмыстарын жүргізбейміз, тек жарық жеткіземіз деп отыр. Ал әкімдіктегілер құжаттарды көтеріп, мән-жайды анықтауға кірісті.
"Қазір қала әкімі ТҮКШ бөліміне желілердің қайда қарайтынын анықтау туралы тапсырма берген болатын. Сонымен қатар тіркелген КСК бар. Олар жалпы үйдегі мәселелерді өздері толығымен шешіп, қарау керек", – деді Петропавл қаласы әкімінің баспасөз хатшысы Әсем Айтулова.
Ал пәтер иелері кооперативінің жұмысына шағым түсіруге болады дейді. Өйткені, олар ақша алып отырған соң тұрғындарға қызмет көрсетуге тиіс.
