2025 жылғы 3 шілдеде Экология және табиғи ресурстар вице-министрі Қазақстандағы қоқыс полигондарының жану себептерін атады, деп хабарлайды Zakon.kz тілшісі.
Ол елімізде санитарлық нормаларға сәйкес ресми жұмыс істейтін полигондармен қатар, рұқсат етілмеген стихиялық қоқыс үйінділері де бар екенін айтты.
"Оларда мезгіл-мезгіл өрттер болып тұрады – бұл шындық, біз мұны жоққа шығармаймыз. Уәкілетті органдармен бірлесіп, мұндай жағдайларды жедел шешуге тырысамыз. Жанудың негізгі екі себебі бар. Біріншісі – полигондардың санитарлық, құрылыс және эпидемиологиялық талаптарға сай келмеуі. Екіншісі – адами фактор. Жасырын емес, қоқыс үйінділері – металл, макулатура сияқты қайта өңделетін материалдарды жинаумен айналысатын белгілі бір топтағы адамдар үшін табыс көзіне айналған", – деді вице-министр.
Оның айтуынша, мұндай рұқсат етілмеген "бизнес" түрі мен адами фактордың нәтижесінде жиі өрт оқиғалары орын алады.
"Мәселе бар, және біз оны шешіп жатырмыз. Бірақ ара-тұра өрттер болып тұрады. Қазіргі уақытта нақты қанша полигон жанып жатқанын айту қиын – бұл ақпарат жергілікті атқарушы органдардан жедел түрде түсіп отырады. Мысалы, 2-3 апта бұрын Астананың шетінде өрт болды. Барлық қызметтер – ТЖД, өрт сөндірушілер және басқалар – жедел әрекет етіп, өртті қысқа мерзімде сөндірді", – деп толықтырды ол.
Бұған дейін Астанада қай жерден және қашан азық-түлікті тиімді бағамен сатып алуға болатындығын жазғанбыз.
