Сұлтан Заурбек чемпиондық белбеуге бір қадам жақындады
Халықаралық бокс федерациясы (IBF) қазақстандық Сұлтан Заурбектің келесі қарсыласын ресми түрде жариялады. Ол –аустралиялық Лиам Уилсон.
Жекпе-жекте жеңіске жеткен жағдайда Сұлтан әлем чемпионы атағы үшін таласуға ресми үміткер атанады. Қазіргі таңда бұл белбеу мексикалық Эдуардо Нуньестің еншісінде.
Сұлтан Заурбек соңғы жекпе-жегін 5 сәуірде Астанада өткізді. Әлем чемпионы атағына үміткер Оңтүстік Африка боксшысы Азинга Фузилемен кездесіп, мансабындағы ең жарқын жеңістерінің біріне қол жеткізді. Енді дәл сондай дайындықпен ол тағы бір былғары қолғап шебері Лиам Уилсонға қарсы шығуы тиіс.
Аустралиялық боксшы кезінде өз елінде болашағы зор спортшы ретінде танылды. Бірақ 2021 жылдың шілдесінде күтпеген жеңіліс оның мансабында соққы болды. Ол кезде Филиппин боксшысы Джой Нойнай Уилсонды бесінші раундта техникалық нокаутпен жеңіп кеткен. Кейін Уилсон реванш алып, Нойнайды екінші раундта нокаутқа жіберді.
Уилсон 2023 жылы WBO тұжырымы бойынша әлем чемпионы Эмануэль Наварретемен жұдырықтасып, сенсация жасауға шақ қалды. Тіпті төртінші раундта мексикалықты ауыр нокдаунға жіберген. Дегенмен тәжірибелі Наваррете кейін есепті теңестіріп, тоғызыншы раундта жекпе-жекті тоқтатуға мәжбүр етті.
Лиам Уилсон техникалық шеберлігімен емес, соққыға соққымен жауап беретін боксымен танылған спортшы. Ол ауыр соққыға төтеп береді, ал сол қолы — оның басты қаруы. Бірақ, қорғаныс - оның әлсіз тұсы.
Сондықтан Сұлтан Заурбек дәл Фузилемен болған жекпе-жек деңгейінде өнер көрсетсе, қарсыластан айтарлықтай артық екенін дәлелдеуі тиіс. Сарапшылардың болжауынша, бұл жекпе-жек күзге қарай ұйымдастырылуы мүмкін.
