Шымкент қаласында күн сайын 850 тонна қоқыс шығарылады.
Қала тазалығына жауаптылар бейнебақылау арқылы тәртіпті арттыруды көздейді. Шымкент қаласының тұрғын үй секторларындағы қоқыс жәшіктеріне бейнебақылау камераларын орнату ұсынылды. Бұл ұсынысты қалалық мәслихат депутаттарымен кездескен коммуналдық сала қызметкерлері көтерді. Олардың айтуынша, тұрмыстық қалдықтармен қатар құрылыс қалдықтарын заңсыз тастау оқиғалары жиілеп кеткен. Коммуналдық мекеме мамандары қоқыс жинаумен ғана шектелмейді. Олар қаладағы ұзындығы 100 шақырым болатын 9 каналдың тазалығына да жауапты. Соған байланысты қызметкерлердің демалуына қолайлы жағдай жасау мәселесі де көтерілді.
Халима Сапарова, Әл-Фараби аудандық коммуналдық қызмет мекемесінің жұмысшысы:
- Жауын-шашынның астында жүреміз. Күннің астында, далада сыпырамыз дегендей. Сол кезде бізге түскі уақытта келіп, тамақ ішетін орын дайындап берсе дейміз. Қазір өзіміз подвал жалдап тұрып жүрміз ғой.
Бақытжан Позилов, қалалық мәслихат депутаты:
- Бұл кісілерді қолдауымыз керек және бұл жерде көтеріліп отырған ең үлкен мәселе оларға ерекше статус беруіміз керек деген сияқты. Олардың жұмыстарын бағалауымыз керек.
