Күні кеше әлеуметтік желілерде аталған оқиғаға қатысты бейнежазба кең таралды.
Видеодан әйелдің кәмелетке толмаған балаға неше түрлі балағат сөз айтып, қол көтергенін байқау қиын емес, деп хабарлайды inbusiness.kz сайты.
Онда баланың қорыққаннан қатты жылағаны естіледі. Желі қолданушылары әйелдің іс-әрекетін қатты сынап жатыр.
– Тағы бір рет қайталасаң, тамағыңды кесемін, қазір сені тұншықтырамын, – деп айқайлаған әйел.
Екібастұз қаласы әкімінің орынбасары Бибігүл Иманғалиева оқиғаға қатысты түсініктеме беріп өтті. Ол аталған дерек бойынша қылмыстық құқық бұзушылықтар туралы істерді тіркеу жүйесіне екі материал енгізілгенін мәлімдеп отыр.
Қазіргі уақытта тиісті тергеу амалдары жүргізілуде.
Ал қалалық полиция бөлімінің ресми мәліметіне сенсек, келіншектің кішкентай балаға дене жарақатын келтіргені бойынша тексеріс басталып та кеткен.
Сот-медициналық сараптама тағайындалған. Нәтижесіне қарай іс бойынша процессуалдық шешім қабылданады.
