Ақтөбеде Владимир Дворковичті еске алуға арналған халықаралық шахмат фестивалі аяқталды
22–30 маусым аралығында Ақтөбенің "ACE" теннис орталығында өткен халықаралық шахмат фестивалі – "Владимир Дворкович мемориалы – Aktobe Open 2025" – шахмат әлемінің назарын Қазақстанға аударды. Жарысқа 20 елден 311 шахматшы қатысып, үш түрлі санатта бақ сынады: Masters (рейтингі 2400-ден жоғары), Challengers (1900–2399) және Open (1400–1899).
Ақтөбеде өткен халықаралық шахмат фестивалі биыл да тартысқа толы бәсекелерімен есте қалды. Турнирдің үш негізгі санатында әлемнің мықты гроссмейстерлері мен дарынды жас үміткерлер бас жүлде үшін бақ сынасты.
Негізгі жарыс саналатын Masters санатында 78 мың долларлық жүлде қоры сарапқа салынды. Сербия атынан сынға түскен гроссмейстер Алексей Сарана 9 мүмкіндіктен 7 ұпай жинап, жеңімпаз атанды. Екінші және үшінші орындарды Үндістан мен FIDE өкілдері бөлісті.
Қазақстандық Қазыбек Ногербек жарыс бойы тамаша ойын көрсеткенімен, соңғы турдағы сәтсіздік оның үздік ондыққа енуіне кедергі болды. Ол турнирді 5½ ұпаймен 12-орында аяқтады. Рейтинг фавориті, Қытайдан келген Ван Хао да дәл осындай нәтиже көрсетті.
Әйелдер арасында өзбекстандық Афруза Хамдамова (2326) үздік атанды. Қазақстан намысын қорғаған Меруерт Камалиденова оған небәрі жарты ұпай ғана ұтылып, мықтылар қатарында қалды.
Challengers санатында 15 мың доллар жүлде қоры үшін тартыс жүрді. Бұл жарыста жергілікті жас шахматшы, небәрі 16 жастағы Алан Петухов қарсыластарын шаң қаптырып, 7 ұпаймен топ жарды. Ол өзінен әлдеқайда тәжірибелі спортшыларды артта қалдырды.
Open санатында басты жеңіс тағы да Ақтөбеде қалды – 14 жастағы Бейбарыс Бекбол 9 партияда 7½ ұпай жинап, үздік атанды. Жас чемпион 7000 долларлық жүлде қорынан 2000 доллар иеленді.
