Жеткіншекке дер кезінде ауруханаға жеткізіліп, медициналық көмек көрсетілді.
Атырауда 10 жасар ұл бала велосипедімен жеделсатыға кірмек болған. Алайда есіктер автоматты түрде жабылып, баланың өзі сыртта қалып, ал велосипеді есік пен лифт кабинасының арасында қысылып қалған, деп жазады inbusiness.kz сайты жергілікті "Ақжайық" газетіне сілтеме басып.
Лифт жоғары қарай қозғала бастағанда, бала велосипедіне жармасып тұрған. Бір сәтте ол ұстап қала алмай, қолын жіберіп, ашық тұрған шахтаға құлап кеткен.
Абырой болғанда, бала аман қалды. Оны дер кезінде ауруханаға жеткізіп, медициналық көмек көрсетілді. Ауыр жарақат алған жоқ.
Қазір оқиғаға байланысты тексеру жүргізіліп жатыр.
"Лифтке "КаспийЛифт" ЖШС қызмет көрсетеді. Лифт тұрғындардың ортақ меншігінде. Қазір лифттің қауіпсіз әрі сенімді жұмыс істеуін қамтамасыз ету мақсатында кезектен тыс техникалық тексеру жүргізілуде", – деп хабарлады Атырау қалалық әкімдігі.
