Солтүстік Қазақстан облысының прокурорлары мүгедектігі бар тұлғалардың конституциялық құқықтарын қорғады, — деп хабарлайды Massaget .kz тілшісі Бас прокуратураға сілтеме жасап.
Қадағалау органы талдау барысында жеке табыс салығын негізсіз ұстаудан көрінетін салық заңнамасын өрескел бұзушылықтарды анықтады.
Мәселен, 2023-2024 жылдары Ақжар, Есіл, Ғ.Мүсірепов, Мамлют, Шал ақын, Тайынша аудандарының жұмыс берушілері "Салық кодексінің және бюджетке төленетін басқа да міндетті төлемдер туралы" (бұдан әрі — Салық кодексі) талаптарына қайшы, мүгедектігі бар 366 жұмысшыдан жалпы сомасы 16,9 млн теңге жеке табыс салығын ұстап қалған, ал олар Салық кодексіне сәйкес төлемнен босатылған.
Есіл ауданында білім бөлімінің лауазымды тұлғалары жалпы сомасы 1,7 млн теңгеге мүмкіндігі шектеулі балалардың 24 заңды өкілінен жеке табыс салығын негізсіз ұстады.
Прокурорлық қадағалау актілері бойынша жоғарыда аталған тұлғаларға мемлекеттік кіріс органдары 6,2 млн теңгені қайтаруды қамтамасыз етіп, кінәлілерді заңда белгіленген жауапкершілікке тарту шараларын қабылдап жатыр.
Қалған соманы қайтару бойынша жұмыс жалғасып жатыр.
Аптаның басты оқиғалары мен пайдалы видеоларды көру үшін YouTube арнамызға жазылыңыз
