Алматыда 13 адамның өмірін қиған хостелдегі өртке қатысты сот процесі аяқталуға жақын. Судья үкім шығару үшін кеңесу бөлмесіне кетті. Бүгін соттағы соңғы сөзінде қос айыпталушы бас бостандығынан айырмауды сұрады, деп хабарлайды КТК телеарнасы.
Сотта қылмыстық іс бойынша хостелдің директоры Әділбек Мұхамедияров пен ғимаратқа өрт қауіпсіздігі жүйесін орнатқан Александр Пекельник жауап берген. Прокурор олардың бірін 4 жылға, екіншісін 5 жылға соттауды сұрады. Ғимаратты жалға алған Мұхамедияров иелері онда өрт қауіпсіздігі сақталған деп сендірді деп отыр. Ол соттағы соңғы сөзінде бес баласы мен қарт ата-анасы бар екенін айтты. Марқұмдардың жақындарына "қаржылай көмектестім" деген ол, өзін түрмеге қамамауды сұрады.
Екінші айыпталушы да сотта хостелдегі өртке "еш қатысым жоқ" деп отыр. Бұл қайғылы оқиға 2023 жылдың қарашасында болған. Қала орталығындағы хостелден өрт шығып, салдарынан 13 адам мерт болған еді. Оның төртеуі шетел азаматы.
Алматыдағы хостелде болған өрт
2023 жылғы 30 қарашада таңғы уақытта Алматы қаласындағы Ади Шәріпов көшесінде орналасқан хостелден өрт шығып, салдарынан 13 адам қаза болды.
Кейін қалалық полиция департменті қаза тапқан барлық адамның жеке басы анықталғанын хабарлады. Олардың тоғызы – Қазақстан, екеуі – Ресей, екеуі – Өзбекстан азаматы.
Хостелдегі өрт фактісі бойынша қылмыстық іс тіркелді.
Сондай-ақ оқиғаға байланысты хостелдегі өрттің себептерін анықтап, зардаптарын жоюмен айналысатын үкіметтік комиссия құрылды.
Президент Қасым-Жомарт Тоқаев пен үкімет басшысы Әлихан Смайылов қайғылы жағдай кезінде қаза тапқан марқұмдардың туған-туыстары мен жақындарына көңіл айтты.
Алматыдағы хостелде шыққан өрттен аман қалған тұрғындар оқиға туралы айтып берген еді.
Кейіннен жатақхананың иесі ұсталғанын хабарлаған болатынбыз.
