Қазақстандық журналист Асхат Ниязов Семейдегі Dala SK тұрын үй құрылыс компаниясын жарнамалап, басы дауға қалды. Журналистің жарнамасынан кейін қазақстандықтар жаппай баспанаға қаражат салған. Ал компанияның өзінде құрылыс салу туралы лицензия әу баста болмаған, деп хабарлайды Skifnews.kz ақпарат порталы.
Асхат Ниязов Dala SK құрылыс компаниясына коммерциялық мақсатта жарнама жасағанын мойындады.
“2024 жылдың аяғында Dala SK компаниясына жарнама жасадым. Кейін олардың құрылыс салуға рұқсаты жоқ екенін білдім. Семейге барып салымшылармен кездестім. Сөйтіп бұл жағдай туралы екінші бейнеролик түсірдім. Қалай болғанын анықтап, біліп YouTube арнамда видео жарияладым”, – деді журналист.
Алайда ол желіде тараған ақпараттың қате тұстары барын да айтып қалды.
“Telegram арнасында жазбада құрылыс компаниясының пәтерлерді сатып жібергені туралы жазылған. Бұл жалған ақпарат. Олар пәтерлерді сатқан жоқ. Адамдар ақшасын салған, бірақ тұрғын үй кешенін сүріп тастағалы жатыр. Осыған байланысты құрылысты тоқтатып тастады”, – дейді Асхат Ниязов.
Журналист Jibek Joly арнасына берген сұхбатында жарнама жасаған сәтте кешеннің 3-4 қабаты тұрғызылғанын, соған қарап құрылыстың заңды түрде салынып жатқанына сенген.
“Құжаттарды тексермегенім қате болды. Бұл үшін мен жауап беремін және ақша құйған салымшылардан кешірім сұраймын. Қазір бәріміз бірігіп, жаңа инвостор табуға тырысып жатырмыз. Әкімдіктермен қарым-қатынасым жақсы деп айта алмаймын. Сол себепті ол жаққа бармадым. Бұл тек жарнамалық бейнеролик болған жоқ. Адамдарға жалпы құрылыс жұмыстарының қалай өтетіні туралы пайдалы ақпарат бергіміз келді. Біз онда кірпіштер, пеноблоктар қалай жасалатынын, терезелер қалай өндірілетінін көрдік. Аталған кәсіпорындардың бәріне барып, барлығын егжей-тегжейлі көрсеттік”, – дейді журналист.
Бейнеролик шыққан соң адамдар Dala SK компаниясының жөндеу жұмыстарына қатысты шағымдар түскен. Сөйтіп Асхат Ниязов зардап шеккен адамдармен байланысып, компания басшылығымен кездесіп, ақшаны қайтаруға тырысып жүргенде тұрғын үйдің заңсыз салынғанын білген.
“Dala SK басшылары Дәурен мен Мұратбек мәселені шешеміз деп жүріп, сапасыз жөндеу жұмыстары үшін адамдарға ақшасын зорға қайтарды. Көңілім тынышталғандай болды. Бірақ бұл ұзаққа созылмады. Семейдегі тұрғын үйдің заңсыз салынғанын білдім. Компания басшыларының бірі – Дәурен қамауға алынып, қылмыстық іс қозғалды”, – деді Асхат Ниязов.
