Бұл туралы АҚШ президенті Дональд Трамп Ақ үйде бюджет пен салық саласындағы жоспарларына арналған шарада мәлімдеді.
АҚШ Қытаймен жаңа сауда келісіміне қол қойып, жақын арада Үндістанмен де осындай келісімге келуге ниетті, деп жазады inbusiness.kz сайты.
"Біз барлық елдермен келісім жасамаймыз. Кейбір елдерге жай ғана хат жолдап, олардың 25%, 35%, 45% төлейтінін ескертеміз", – деді АҚШ әкімшілігінің басшысы.
Мұнысымен АҚШ-тағы импорттық баж салығының мөлшерлемелерін меңзеп отыр. Айта кетейік, биыл 2 сәуірде Трамп 185 ел мен аумақтың өнімдеріне кедендік баж салығын енгізетінін мәлімдеді. Жалпыға бірдей 10% мөлшеріндегі тарифтер 5 сәуірден, ал жекелей тарифтер 9 сәуірден бастап күшіне енді.
Сол күні-ақ АҚШ президенті баж салығының бір бөлігін 90 күнге тоқтата тұру туралы шешім қабылдағанын хабарлады. Ақ үй бұл шешімді сауда келіссөздерінің өтуімен байланыстырды. Осы кезеңде 10% мөлшеріндегі жалпыға бірдей тариф қолданылады.
