Парламенттің бірлескен отырысы өтіп жатыр.
Премьер-министр Олжас Бектенов республикалық бюджет тапшылығын төмендету жоспарымен таныстырды, деп хабарлайды inbusiness.kz сайты.
"Екі жыл бойы ұлттық даму жоспарында мәлімделген маңызды міндеттер іс жүзіне аспай жатыр. Мемлекеттік борышқа қызмет көрсету, оны өтеу шығындары осы жылы 6,1 трлн теңгені немесе бюджеттің барлық кірісінің 38 пайызын құрады. Ұлттық қордың қаражаты 10 жылда республикалық бюджеттің 30 пайызын жауып келеді. Мұнайға қатысты емес тапшылық жалпы ішкі өнімнің 8 пайызына тең, жеке инвестициялардың үлесі азайып отыр. Іскерлік ортаны нығайтудың орнына НДС қайтару үлкен проблемаға айналды. Бюджеттің атқарылуы стартегиялық міндеттерді шешуге емес, бюджеттің жыртығын жамауға бағытталуда. Ал Үкіметтің қолында Парламент жасақтап берген жаңа Бюджеттік кодекс, жаңа Салық кодексі, ұлттық даму жоспары құралдары бар. Өркендеудің нақты көрсеткіштері жоқ. Үкімет бюджеттің жыртығын жамауды тоқтатып, ұлттық өркендеуге қашан көшеді? Тым болмаса мемлекет қаржысын қалай тұрақтандырасыздар?", – деп сұрады мәжілісмен Ерлан Саиров.
Премьер-министрдің сөзінше, депутат елдің көкейінде тұрған мәселені көтеріп отыр.
"Біріншіден, мемлекет өз міндеттемелерін толық көлемде орындап жатыр, орындайды да. Бұған бізде ешқандай күмән жоқ. Жалпы экономикалық ахуал тұрақты, бірақ сіз айтып өткен проблемалық мәселелер жоқ емес, бар. Ол өздеріңіз білетіндей, бір күнде пайда болған проблемалық мәселелер емес. Бірнеше жылдар бойы қалыптасып жатқан проблема. Үкімет қазіргі таңда оның бәрін шешу үшін белсенді жұмыс атқарып жатыр. Үкіметтің ьасиамасымен елімізде салық реформасы жүріп жатыр. Жуырда ғана жаңа Салық кодексі қабылданды", – деді Олжас Бектенов.
Жаңа құжаттың арқасында келесі жылдан бастап республикалық бюджетке шамамен 3 трлн теңгеден астам қосымша түсімдер күтіліп отыр.
"Бұл ақшаның бәрі тек даму мақсаттарына бағытталатын болады. (...) Қазір біз келесі үш жылға арналған республикалық бюджет жобасын дайындап жатырмыз. Өте қызу жұмыс жүріп жатыр. Алдын ала айтатыным, біз 2026 жылы бюджет тапшылығын қазіргі 2,7 пайыздан 2,5 пайызға дейін, 2027 жылы – 1,8 пайызға дейін, 2028 жылы 1,4 пайызға дейін төмендетеміз деп жоспарлап жатырмыз", – деді Үкімет басшысы.
