Астанада төрт жыл қызмет еткен Ұлыбритания және Солтүстік Ирландияның Қазақстандағы елшісі Кэти Лич дипломатиялық миссиясын аяқтап жатыр. Бұл туралы еліміздің Сыртқы істер министрлігіне сілтеме жасаған KAZ.NUR.KZ хабарлайды.
Ведомствоның мәліметінше, Сыртқы істер министрінің орынбасары Роман Василенко дипломатиялық миссиясының аяқталуына байланысты Ұлыбритания және Солтүстік Ирландия Құрама Корольдігінің Қазақстандағы елшісі Кэти Личті қабылдаған.
Министрдің орынбасары Личке Астанада өткен төрт жылдық қызметі барысында екіжақты ынтымақтастықтың дамыуына қосқан елеулі үлесі мен табысты өзара іс-қимылы үшін алғыс білдіріп, президент Қасым-Жомарт Тоқаевтың атынан алғыс хат пен "Барыс" төсбелгісін табыстаған.
"Осы кезең аралығындағы маңызды жетістіктер ретінде белсенді саяси диалогты қолдау, қазақ-британ стратегиялық диалогы мен үкіметаралық комиссияның отырыстарын өткізу, сондай-ақ экономикалық және білім беру байланыстарын кеңейту, оның ішінде Қазақстанда британдық жоғары оқу орындары мен мектептердің филиалдарын ашылуын атап өтуге болады.
Шарттық-құқықтық базаны нығайту тұрғысында 2024 жылы екі ел арасында стратегиялық серіктестік пен ынтымақтастық туралы келісімге қол қойылуы тағы – бір маңызды қадам", — делінген хабарламада.
Өз кезегінде Ұлыбритания елшісі қазақ тарапына жан-жақты қолдауы мен қонақжайлығы үшін алғысын білдіріп, екі мемлекет арасындағы өзара тиімді қарым-қатынастардың табысты дами беретініне сенім білдірді.
Кездесу соңында Роман Василенко әріптесіне алдағы кәсіби қызметіне табыс тіледі.
