Ол "жалған инвестицияға" сеніп, соңында алданып ақшасыз қалған.
Солтүстік Қазақстан облысында полицейлер ақшаны көбейту, инвестиция және тез табыс табуды уәде ететін өзге де интернет-алаяқтық схемаларының қауіпті екенін хабарлады, деп жазады inbusiness.kz сайты.
ІІМ мәліметінше, әлеуметтік желілер мен мессенджерлерде жеңіл табыс пен инвестиция туралы жарнамалар жиі кездеседі. Осы жарнамалар арқылы алаяқтар WhatsApp желісі арқылы хабарласып, өзін инвестициялық немесе кеңес беру компаниясының өкілі ретінде таныстырады.
"Алаяқтар сайтта кіріс өсіп жатқандай көрінетін жалған статистика көрсетеді. Мұны көрген азаматтар несие алып, туыстарынан қарыз сұрап, үлкен сомалар аударады", – дейді облыстық полиция департаменті.
Петропавлда тұратын азамат осылайша "биржалық операцияларға" сеніп, алаяқтарға 19 миллион теңге аударған. Платформада көрсетілген табыс доллармен өскен, бірақ ол ақшасын шешіп алмақ болған кезде, алаяқтар байланысқа шықпай қойған.
Жалпы, 2025 жылдың алғашқы бес айында Солтүстік Қазақстан облысында 27 адам киберқылмыстың құрбаны болды. Полицейлер интернет пен әлеуметтік желі қолданушыларының "жеңіл табыс табу" туралы уәделеріне сенбеуге және бейтаныс адамдарға ақша аудармауға шақырады.
