Шымкентте ауа температурасының 43 градустан асуына байланысты электр желілеріне түсетін жүктеме күрт артқан.
Соның салдарынан кей аудандарда жарық өшіп, тұрғындар қолайсыздыққа тап болды, деп жазады inbusiness.kz сайты.
"Оңтүстік Жарық Транзит" компаниясының мәліметінше, жабдықтардың шамадан тыс жүктелуі мен жерасты кабельдерінің бүлінуі апатқа себеп болған. Сонымен қатар кей жерлерде бөгде ұйымдардың келісімсіз жүргізген жер қазу жұмыстары да жүйенің бұзылуына әсер еткен.
Компания апаттық-қалпына келтіру бригадаларын күшейтіп, ақауларды жоюға кіріскенін хабарлады.
– Электриктер жарықты тұрақты жеткізу үшін тәулік бойы жұмыс істеп жатыр, – деп мәлімдеді компания өкілдері. Олар тұрғындардан түсіністік танытуды сұрап, келтірілген қолайсыздық үшін кешірім білдірді.
Синоптиктердің болжамынша, алдағы күндері ыстық біртіндеп бәсеңдейді. 25 маусымда ауа температурасы +26°С дейін төмендеп, бұлтты, бірақ жауын-шашынсыз ауа райы сақталады. 26 маусымда +28...+30°С, ал 27 маусымда +30...+32°С дейін көтеріледі.
