Энергетика вице-министрі Сұңғат Есімханов 2025 жылғы 25 маусымда ОКҚ-да өткен баспасөз мәслихатында жеке үйлердің иелері күн батареяларынан қалай ақша табуына болатынын айтты, деп хабарлайды Zakon.kz.
Ол Қазақстандағы жеке үйлердің тұрғындары мен кәсіпкерлер шатырға немесе жер учаскесіне күн батареяларын орната алатынын жеткізді.
"Өткен жылы біз заңнаманы жаңарттық. Қарапайым тілмен айтқанда: жеке үйдің тұрғыны шатырына 200 киловаттық күн батареясын орната алады. Оның 100-ін өзі тұтынып, ал қалған 100-ін желіге сата алады және энергия тасымалдаушы компаниясы оны осы саладағы орташа тариф бойынша сатып алуға міндетті. Бұл өте тиімді тетік", — деді Сұңғат Есімханов.
Ол жеке үйлерде орнатылған осындай батареялар әлі аз екенін айтады. Мұнымен шағын бизнес өкілдері әлдеқайда белсенді айналысады. Өткен жылы халық пен шағын бизнестің орнатқан күн панельдерінің қуаты екі еседен астамға өсті. Билік әкімдіктердің көмегімен осындай қолдауды одан әрі дамытып, кеңейтуді жоспарлап отыр.
2024 жылдың соңындағы жағдай бойынша, Қазақстанда жалпы қуаты 3 032 МВт болатын 153 ЖЭК объектісі жұмыс істейді, бұл елдегі электр энергиясын өндірудің жалпы көлемінің 6,43%-ын қамтамасыз етуге мүмкіндік беруде.
Айта кетсек,2025 жылғы 27 мамырда үкіметтегі брифинг барысында Энергетика вице-министрі Сұңғат Есімханов Қазақстанда электр энергиясы тарифтерінің неге өсіп жатқанын айтқан.
