2025 жылғы 25 маусымда Үкімет отырысында Премьер-министр Олжас Бектенов "Таза Қазақстан" бағдарламасы аясында бірқатар тапсырмалар берді, деп хабарлайды Zakon.kz тілшісі.
Үкімет басшысы жастар арасында экологиялық мәдениетті қалыптастыру мақсатында қоғамды, қауымдастықтар мен бірлестіктерді белсенді түрде тартуды қамтамасыз етуді тапсырды.
"Отбасылық дәстүрлі құндылықтарды, қоғамдағы дұрыс мінез-құлықты, мәдени мұраларға ұқыпты қарауды, туған жерге деген патриотизмді бірлесе отырып сіңіру қажет. Бұл бағыттарды "Адал азамат" тәрбиелік бағдарламасына енгізу керек", – деді Олжас Бектенов.
Оқу-ағарту, ғылым және жоғары білім министрліктеріне осыған сәйкес өзгерістер енгізу тапсырылды. Туризм министрлігіне облыстар мен қалалар әкімдіктерімен бірлесіп, әр елді мекен бойынша бұқаралық спорттық іс-шаралардың бірыңғай күнтізбесін әзірлеу жүктелді.
Сондай-ақ, экотуризмнің негізгі нысандарының картасын жалпы халыққа қолжетімді етіп дайындау қажет. Бұл картада нысанның орны, туристік объектілер және басқа да қажетті ақпараттар болуы тиіс.
"Мәдениет министрлігі мүдделі мемлекеттік органдармен бірлесіп, бір ай ішінде халықтың экологиялық және рухани мәдениетін қалыптастыру бойынша нақты ұсыныстар әзірлеуі тиіс. Осы жұмыстардың нәтижесінде "Таза Қазақстан" экологиялық мәдениетті дамыту тұжырымдамасын өзектендіру қажет", – деді Премьер-министр.
Олжас Бектенов экологиялық мәдениет Қазақстан қоғамының ажырамас бөлігіне айналуы тиіс екенін ерекше атап өтті.
"Бір қарапайым философияны түсінуіміз керек: тазалық – тек үнемі тазаланатын жерде ғана емес, сонымен қатар қоқыс тасталмайтын жерде болады. Бұл – дамыған елдерде қалыптасқан норма. Біз балаларға табиғаттың бір бөлшегі екенімізді және оны қорғау қажеттігін үйретуіміз қажет. Бұл жерде өзге елдердің озық тәжірибесін зерделеп, оны қолдану маңызды", – деді Үкімет басшысы.
Бұған дейін "Таза Қазақстан" акциясына 2 миллион адамның қатысқандығын жазған болатынбыз.
