Алматыдағы қатты дауыл кезінде қала тұрғыны Райхан Есалиева ажал аузынан аман қалған. Оған алғашқылардың бірі болып, сол жерде жүрген хирург көмекке келген, деп хабарлайды 24KZ телеарнасына сілтеме жасаған KAZ.NUR.KZ.
Оқиға 19 маусымда болған. Сол күні демалыстағы дәрігер Ғазиз Төлепбергенов кешке қарай базарға келеді. Сағат алтыдан кейін сауда орны ақырындап жабылып жатқан. Азық-түлік дүкенінде жұмыс істейтін Райхан Есалиева да үйіне қайтуға ыңғайланып, сыртқа бет алған. Кенеттен дауыл соғып, ғимараттың үстіңгі шыны қабырғасы оның үстіне құлап түскен.
"Бірінші басыма түсті, одан кейін қолыма түсті. Қарасам қан атқылап жатыр, өзімді қорғаймын деп жүгірдім. Сол кезде Ғазиз Құнанбайұлы жалғыз өзі балық алуға кірген ғой, басқа ешкім жоқ", — дейді қала тұрғыны Райхан Есалиева.
Жанұшыра шыққан дауысты естіген Ғазиз Құнанбайұлы бірден көмекке ұмтылған. Сол жерде табылған орамалмен әйелдің қолын байлап, қанды тоқтатып, жедел жәрдемді бірге күткен. Жалғыз фельдшердің келгенін көрген соң жарақат алған әйелмен ауруханаға ілесіп барған.
Жолай әріптестеріне хабарласып, жағдайды баяндап, алдын ала күтіп алуды сұрайды.
Ғазиз Төлепбергеновтың айтуынша, Райхан Есалиева дер кезінде көрсетілген көмектің арқасында аман қалған.
"Дәрігерлердің бәрі дайын тұрды, Ғазиз Құнанбаевич өзі хабарласып отырды. Бірінші Алла, одан кейін Ғазиз Құнанбаевич және №7 қалалық ауруханың дәрігерлері өмірімді сақтап қалды. Операция – өте сәтті өтті", — дейді Райхан Есалива.
Райхан Есалива емін енді жергілікті емханада жалғастырады. Жарақаттың жібін алған соң оңалтудан өтуі тиіс. 5-6 айдан соң тағы микрохирургиялық операция жасалады.
Ал Ғазиз Төлепбергенов мұндай жағдайда кез келген дәрігер осылай көмекке келер еді дейді.
"Ол біздің парызымыз, мамандығымыз. Бірінші кезекте әйелдің өмірін, одан кейін қолын сақтап қалдық", — деді ол.
