Құжатты қайта рәсімдеуге арналған пилоттық жоба eGov.kz порталында және eGov Mobile қосымшасында іске қосылды.

Енді қазақстандықтар жеке куәлікті толығымен онлайн рәсімдей алады. Жобаны Цифрлық даму, инновациялар және аэроғарыш өнеркәсібі министрлігі мен Ішкі істер министрлігі бірлесіп жүзеге асыруда, деп жазады inbusiness.kz сайты.

Онлайн өтінім беру үшін:

  • қосымшада авторизациядан өту,

  • тиісті қызметті таңдау,

  • биометриялық сәйкестендіруден өту,

  • қажетті мәліметтерді енгізу,

  • құжатты алу орнын көрсету,

  • мемлекеттік баж салығын төлеу

  • және өтінімді Face/Touch ID арқылы растау қажет.

Бұл қызмет тек жеке куәлік иесіне қолжетімді. Басқа адамның атынан, сенімхат немесе қамқоршылық арқылы рәсімдеу қарастырылмаған.

Қызмет тек жеке куәліктің жарамдылық мерзімі аяқталған жағдайда көрсетіледі. Өтінім құжаттың мерзімі бітуге 30 күн қалғанда немесе мерзімі өткен соң 10 күн ішінде берілуі тиіс. Дайын құжатты азамат өзі таңдаған тіркеу пунктінен алады. Стандартты дайындау мерзімі – 15 жұмыс күні.